Ure alysednysse anginn we gehyrdon on ðisre dægþerlican rædinge, þurh ða we awurpon þa derigendlican ealdnysse, and we sind getealde betwux Godes bearnum, þurh Cristes flæsclicnysse. Swiðe þæslic anginn menniscre alysednysse wæs þæt þa se engel wearð asend fram Gode to ðam mædene, to cyðenne Godes acennednysse þurh hí; forðan ðe se forma intinga mennisces forwyrdes wæs, þaþa se deofol asende oðerne deofol, on næddran anlicnysse, to ðam frumsceapenan wífe Euan, hí to beswicenne. Us becom ða deað and forwyrd þurh wíf, and us becom eft lif and hredding þurh wimman. Se heah-engel, þe cydde þæs Hælendes acennednysse, wæs {196} gehaten Gabrihel, þæt is gereht, 'Godes strengð,' þone he bodode toweardne, þe se sealm-sceop mid þisum wordum herede, "Drihten is strang and mihtig on gefeohte." On ðam gefeohte, butan tweon, þe se Hælend deofol oferwann, and middangeard him ætbræd. "Maria wæs beweddod Iosepe ðam rihtwisan." Hwí wolde God beon acenned of beweddodan mædene? For micclum gesceade, and eac for neode. Þæt Iudeisce folc heold Godes ǽ on þam timan: seo ǽ tæhte, þæt man sceolde ælcne wimman þe cild hæfde butan rihtre æwe stænan. Nu ðonne, gif Maria unbeweddod wære, and cild hæfde, þonne wolde þæt Iudeisce folc, æfter Godes ǽ, mid stanum hí oftorfian. Ða wæs heo, ðurh Godes foresceawunge, þam rihtwisan were beweddod, and gehwá wende þæt he ðæs cildes fæder wære, ac he næs. Ac ðaða Ioseph undergeat þæt Maria mid cilde wæs, þa wearð he dreorig, and nolde hire genealæcan, ac ðohte þæt he wolde hí diglice forlætan. Þaða Ioseph þis smeade, þa com him to Godes engel, and bebead him, þæt sceolde habban gymene ægðer ge ðære meder ge þæs cildes, and cwæð, þæt þæt cild nære of nanum men gestryned, ac wære of þam Halgan Gaste. Nis na hwæðere se Halga Gast Cristes Fæder, ac hé is genemned to ðære fremminge Cristes menniscnysse; forðan ðe he is Willa and Lufu þæs Fæder and þæs Suna. Nu wearð seo menniscnys þurh þone micclan Willan gefremmed, and is ðeah-hwæðere heora Ðreora weorc untodæledlic. Hi sind þry on hádum, Fæder, and Sunu, and Halig Gast, and an God untodæledlic on anre godcundnysse. Ioseph ða, swa swa him se engel bebead, hæfde gymene ægðer ge Marian ge ðæs cildes, and wæs hyre gewita þæt heo mæden wæs, and wæs Cristes fostor-fæder, and mid his fultume and frofre on gehwilcum ðingum him ðenode on ðære menniscnysse. Se engel grette Marian, and cwæð, þæt heo wære mid Godes gife afylled, and þæt hyre wæs God mid, and heo wæs gebletsod betwux wifum. Soðlice heo wæs mid Godes gife {198} afylled, forðon ðe hire wæs getiðod þæt heo ðone abǽr þe astealde ealle gifa and ealle soðfæstnyssa. God wæs mid hire, forðan ðe he wæs on hire innoðe belocen, seðe belicð ealne middangeard on his anre handa. And heo wæs gebletsod betwux wifum, forðan ðe heo, butan wiflicre bysnunge, mid wlite hyre mægðhádes, wæs modor þæs Ælmihtigan Godes.