Næs na Cristes ðrowung gefremmed on þisum dæge, ac ða feower godspelleras awriton his ðrowunga on feower gesetnyssum; þa ane we rædað nu to-dæg, and ða oðre on ðisre wucan. Þa Iudei genámon hine on frige-æfen, and heoldon hine ða niht, and ðæs on merigen hí hine gefæstnodon on rode mid feower nægelum, and mid spere gewundedon. And ða embe nón-tid, þaþa hé forðferde, þa comon twegen gelyfede men, Ioseph and Nichodemus, and bebyrigdon his líc ær æfene, on niwere ðryh, mid deorwyrðum reafum bewunden. And his líc læg on byrgene þa sæter-niht and sunnan-niht; and seo godcundnys wæs on ðære hwile on helle, and gewrað þone ealdan deofol, and him of-anam Adám, þone frumsceapenan man, and his wíf Euan, and ealle ða ðe of heora cynne Gode ǽr gecwemdon. Þa gefredde se deofol þone angel þe he ǽr grædelice forswealh. And Crist arás of deaðe on þone easterlican sunnan-dæg, þe nu bið on seofon nihtum; be ðam is gelimplicor þonne mare to reccenne þonne nu sy: ac uton nu sprecan be ðyses dæges wurðmynte. {218} Se gewuna stent on Godes cyrcan, þurh lareowas geset, þæt gehwær on Godes gelaðunge se sacerd bletsian sceole palm-twigu on ðisum dæge, and hí swa gebletsode ðam folce dælan; and sceolon ða Godes þeowas singan ðone lofsang, þe þæt Iudeisce folc sang togeanes Criste, þaþa he genealæhte his ðrowunge. We geeuenlæcað þam geleaffullum of ðam folce mid þisre dæde, forðan ðe hi bæron palm-twigu mid lofsange togeanes þam Hælende. Nu sceole we healdan urne palm, oðþæt se sangere onginne ðone offring-sáng, and geoffrian þonne Gode ðone palm, for ðære getacnunge. Palm getacnað syge. Sygefæst wæs Crist þaþa he ðone micclan deofol oferwann, and us generede: and we sceolon beon eac sygefæste þurh Godes mihte, swa þæt we ure unðeawas, and ealle leahtras, and ðone deofol oferwinnan, and ús mid godum weorcum geglencgan, and on ende ures lifes betæcan Gode ðone palm, þæt is, ure sige, and ðancian him georne, þæt we, ðurh his fultum, deoful oferwunnon, þæt he us beswican ne mihte. Synfulra manna deað is yfel and earmlic, forðan ðe hí farað of ðisum scortan life to ecum pinungum: and rihtwisra manna deað is deorwyrðe, forði ðonne hí geendiað ðis geswincfulle líf, þonne beoð hí gebrohte to ðam ecan life, and bið þonne swylce heora ende beo anginn; forðan ðe hí ne beoð na deade, ac beoð awende of deaðe to life. Se lichama, ðe is þære sawle reaf, anbidað þæs micclan domes; and ðeah he beo to duste formolsnod, God hine arærð, and gebrincð togædere sawle and lichaman to ðam ecan life; and bið þonne gefylled Cristes behát, ðe ðus cwæð, "Þonne scínað ða rihtwisan swa swa sunne on heora Fæder ríce," seðe leofað and rixað á butan ende on ecnysse. Amen. Circlice ðeawas forbeodað to secgenne ænig spel on þam þrym swig-dagum. {207} FOR PALM SUNDAY. Cum adpropinquasset Jesus Hierosolymis, et venisset Bethfage ad montem Oliveti: et reliqua.