Þa ðe ðæra treowa bogas heowon, and mid þam Cristes weig gedæfton, þæt sind þa lareowas on Godes cyrcan, þe plucciað þa cwydas ðæra apostola and heora æftergengena, {214} and mid þam Godes folce gewisiað to Cristes geleafan, þæt hí beon gearwe to his færelde. Þæt folc ðe Criste beforan stóp, and þæt ðe him fyligde, ealle hí sungon, "Osanna Filio Dauid," þæt is on urum geðeode, "Sy hǽlo Dauides Bearne." Þa ðe Criste beforan stopon, þa sind ða heahfæderas and þa wítegan, ðe wæron ǽr Cristes flæsclicnysse; and ða ðe him bæftan eodon, þæt sind ða ðe æfter Cristes acennednysse to him gebugon, and dæghwamlice bugað: and ealle hí singað ænne lofsang; forðan ðe wé and hí ealle healdað ænne geleafan, swa swa Petrus se apostol cwæð, ðaða he spræc be ðam heahfæderum, "We gelyfað þæt we beon gehealdene þurh Cristes gife, swa swa hí." Hí cwædon "Dauides Bearn," forðan þe Crist is þæs mæran cyne-cynnes Dauides, æfter þære menniscnysse. Of ðam cynne wæs seo eadige Maria his modor. Hi sungon, "Gebletsod is se ðe com on Godes naman." Se Hælend com on Godes naman, forðan þe se Heofenlica Fæder hine asende ús to alysednysse; and ealle ða wundra þe hé worhte, on eallum he herede and wuldrode his Fæder naman. "Sy hælo Dauides Bearne on heahnyssum." Þæs Hælendes to-cyme and his ðrowung wæs halwendlic ægðer ge mannum ge englum; forðan ðe wé geeacniað heora werod, þe se feallenda deofol gewanode; be ðam cwæð se apostol Paulus, "Þæt sceoldon ealle heofenlice ðing and eorðlice beon ge-edstaðelode on Criste." Se Hælend wæs wunigende binnan ðam temple of ðisum dæge oð nu on ðunres-dæg, and ægðer ge mid láre ge mid wundrum þæt folc tihte to soðfæstnysse and to rihtum geleafan. Þa namon ða heafod-men ándan ongean his láre, and syrwedon mid micelre smeaunge, hu hi mihton hine to deaðe gebringan. Ne mihte se deað him genealæcan, gif he sylf nolde, ac he com to mannum to ði þæt he wolde beon gehyrsum his Fæder oð deað, and mancynn alysan fram ðam ecan deaðe mid his hwilwendlicum deaðe. Þeah-hwæðere {216} ne nydde he na þæt Iudeisce folc to his cwale, ac deofol hí tihte to ðam weorce, and God þæt geðafode, to alysednysse ealles geleaffulles mancynnes. We habbað oft gesæd, and gít secgað, þæt Cristes rihtwisnys is swa micel, þæt he nolde niman mancyn neadunga of ðam deofle, buton he hit forwyrhte. He hit forwyrhte ðaða he tihte þæt folc to Cristes cwale, þæs Ælmihtigan Godes; and ða þurh his unscæððigan deað wurdon we alysede fram ðam ecan deaðe, gif we us sylfe ne forpærað. Þa getimode ðam reðan deofle swa swa deð þam grædigan fisce, þe gesihð þæt ǽs, and ne gesihð ðone angel ðe on ðam æse sticað; bið þonne grædig þæs æses, and forswylcð þone angel forð mid þam æse. Swa wæs þam deofle: he geseh ða menniscnysse on Criste, and na ða godcundnysse: ða sprytte he þæt Iudeisce folc to his slege, and gefredde ða þone angel Cristes godcundnysse, þurh ða hé wæs to deaðe aceocod, and benǽmed ealles mancynnes þara ðe on God belyfað.