Oft ge gehyrdon embe ðæs Hælendes ærist, hú hé on ðisum dæge of deaðe arás; ac we willað eow myngian, þæt hit ne gange eow of gemynde. "Þaða Crist bebyrged wæs, þa cwædon þa Iudeiscan to heora ealdormenn Pilate, La leof, se swica ðe her ofslegen is, cwæð gelomlice, þaþa hé on lífe wæs, þæt hé wolde arisan of deaðe on þam ðriddan dæge:" et reliqua. We cweðað nu, gif hwá his lic forstæle, nolde he hine unscrydan, forðan ðe stalu ne lufað nane yldinge. Crist wearð æteowed on ðam ylcan dæge Petre, and oðrum twam his leorning-cnihtum, and hí gefrefrode. "Þa æt nextan com se Hælend to his leorning-cnihtum, þær hí gegaderode wæron, and cwæð him to, Sy sibb betwux eow; ic hit eom, ne beo ge na afyrhte. Þa wurdon hí afærede, and wendon þæt hit sum gast wære. Ða cwæð he him to, Hwí sind ge afærede, and mislice ðencað be me? Sceawiað mine handa and mine fét, þe wæron mid næglum þurhdrifene. Grapiað and sceawiað: gif ic gast wære, ðonne næfde ic flæsc and ban:" et reliqua. Se Hælend wearð þa gelomlice ætíwed his leorning-cnihtum, and hí gewissode to ðære lare and to ðam geleafan, hú hí eallum mancynne tæcan sceoldon; and on ðam feowertigoðan dæge his æristes hé astáh lichamlice to heofonum to his Fæder. Ac we habbað nú micele maran endebyrdnysse þære Cristes bec gesǽd þonne ðis dægðerlice godspel behæfð, for trymminge eowres geleafan. Nu wylle we eow gereccan þæs dægþerlican godspelles traht, æfter ðæs halgan papan Gregories trahtnunge. Mine gebroðra þa leofostan, ge gehyrdon þæt þa halgan wíf, þe Drihtne on life filigdon, comon to his byrgene mid þære deorwyrðan sealfe, and þone ðe hí lufedon on lífe þam hí woldon deadum mid menniscre gecneordnysse ðenian. Ac {222} ðeos dǽd getacnað sum ðing to dónne on Godes gelaðunge. We ðe gelyfað Cristes æristes, we cumað gewislice to his byrgene mid deorwyrðre sealfe, gif we beoð gefyllede mid bræðe haligra mihta, and gif we mid hlysan godra weorca urne Drihten secað. Þa wíf ðe ða sealfe brohton, hi gesawon englas; forðan ðe ða geseoð þa heofonlican englas, þa þe mid bræðum godra weorca gewilniað þæs upplican færeldes. Se engel awylte þæt hlíd of ðære ðryh; na þæt hé Criste útganges rymde, ac he geswutelode mannum þæt hé arisen wæs. Se ðe com deaðlic to ðisum middangearde, acenned þurh beclysedne innoð þæs mædenes, se ylca, butan twéon, ðaða hé arás undeaðlic, mihte belocenre ðríh faran of middangearde. Se engel sæt on ða swiðran healfe ðære byrgene. Seo swiðre hand getacnað þæt ece líf, and seo wynstre ðis andwearde líf. Rihtlice sæt se engel on ða swiðran hand, forðon þe he cydde þæt se Hælend hæfde ða oferfaren ða brosnunga ðises andweardan lifes, and wæs ða wunigende on ecum ðingum undeaðlic. Se bydel wæs ymbscryd mid scinendum reafe, forðan ðe he bodade þa blisse þisre freols-tíde, and ure mærða. Hwæðer cweðe we, ðe ure ðe ðæra engla? We cweðað soðlice, ægðer ge ure ge heora. Þæs Hælendes ærist is ure freols-tíd and bliss, forðan ðe he