gelædde us mid his æriste to ðære undeadlicnysse þe we to gesceapene wæron. His ærist wæs þæra engla bliss, forðon ðe God gefylð heora getel, þonne he ús to heofonum gebrincð. Se engel gehyrte ða wíf, þus cweðende, "Ne beo ge afyrhte:" swilce he swa cwæde, Forhtian ða ðe ne lufiað engla to-cyme; beon ða ofdrædde þa þe sint ofsette mid flæsclicum lustum, and nabbað nænne hiht to engla werode. Hwi forhtige ge, ge ðe geseoð eowre geferan? "His wlite wæs swilce líget, and his reaf swa hwít swa snáw." Soðlice on lígette is óga, and on snáwe liðnys þære beorhtnysse. Rihtlice wæs se bydel Cristes æristes swa gehíwod; forðan þonne he sylf cymð to ðam micclan dome, þonne bið he swiðe egeful ðam synfullum, and swiðe liðe þam rihtwisum. {224} He cwæð, "Ge secað þone Hælend: hé arás: nis hé her." He næs ða lichamlice on ðære byrgene, seðe æghwær bið þurh his godcundan mihte. Þær lǽig þæt reaf bæftan þe he mid bewunden wæs, forðon ðe hé ne rohte þæs eorðlican reafes, syððan he of deaðe arás. Þeah man deadne mannan mid reafe bewinde, ne arist þæt reaf na ðe hraðor eft mid þam men, ac he bið mid þam heofenlicum reafe gescryd æfter his æriste. Wel is gecweden be ðam Hælende, þæt he wolde cuman togeanes his geferon on Galilea. Galilea is gecweden 'Oferfæreld.' Se Hælend wæs ða afaren fram ðrowunge to ǽriste, fram deaðe to life, fram wite to wuldre. And gif we farað fram leahtrum to halgum mægnum, þonne mote we geseon ðone Hælend æfter urum færelde of ðisum life. Twa líf sind soðlice: þæt án we cunnon, þæt oðer us wæs uncuð ær Cristes to-cyme. Þæt án líf is deadlic, þæt oðer undeadlic. Ac se Hælend com and underfeng þæt án líf, and geswutelode þæt oðer. Þæt án líf he æteowde mid his deaðe, and þæt oðer mid his æriste. Gif he us deadlicum mannum ærist and þæt ece líf behete, and þeah-hwæðere nolde hit þurh hine sylfne geswutelian, hwa wolde þonne his behatum gelyfan? Ac ðaða he man beon wolde, ða gemedemode hé hine sylfne eac to deaðe agenes willan, and he arás of deaðe þurh his godcundan mihte, and geswutelode þurh hine sylfne þæt þæt he us behét. Nu cwyð sum man on his geðance, 'Eaðe mihte he arisan of deaðe, forðan ðe he is God: ne mihte se deað hine gehæftan.' Gehyre se mann þe þis smeað andsware his smeagunge. Crist forðferde ana on ðam timan, ac he ne arás na ana of deaðe, ac arás mid micclum werede. Se godspellere Matheus awrát on Cristes béc, þæt manega halige menn, ðe wæron on ðære ealdan ǽ forðfarene, þæt hí arison mid Criste; and þæt sædon gehwilce wíse láreowas, þæt hi habbað gefremod heora ærist to ðam ecan lífe, swa swa we ealle dón sceolon on ende þisre worulde. Þa láreowas cwædon, {226} þæt ða aræredan menn næron soðlice gewitan Cristes æristes, gif hí næron ecelice arærde. Nu sind adwæscede ealle geleaflystu, þæt nan man ne sceal ortruwian be his agenum æriste, þonne se godspellere awrát þæt fela arison mid Criste, ðe wæron anfealde men, ðeah ðe Crist God sy.