Nu cwæð Gregorius se trahtnere, þæt him come to gemynde, hu ða Iudeiscan clypodon be Criste, þaða he wæs on ðære rode gefæstnod. Hí cwædon, "Gif he sy Israhela cyning, þonne astige he nu of ðære rode, and we gelyfað on hine." Gif he ða of ðære rode astige, and nolde heora hosp forberan, þonne, butan tweon, ne sealde he us nane bysne his geðyldes: ac he abád hwon, and forbær heora hosp, and hæfde geðyld. Ac se ðe nolde of ðære rode abrecan, se arás of ðære byrgene. Mare wundor wæs, þæt hé of deaðe arás, þonne he cucu of ðære rode abræce. Mare miht wæs, þæt he ðone deað mid his æriste tobræc, þonne he his líf geheolde, of ðære rode astigende. Ac ðaða hí gesawon þæt he ne astah of ðære rode for heora hospum, ac ðæron deaðes gebád, þa gelyfdon hí þæt he oferswiðed wære, and his nama adwæsced: ac hit gelamp swa, þæt of ðam deaðe asprang his nama geond ealne middangeard. Þa wearð hyra bliss awend to ðam mæstan sare; forðan ðe heora sorh bið endeleas. Þas ðing getacnode se stranga Samson, se hæfde fæhðe to ðam folce ðe is gehaten Philistei. Ða getimode hit þæt he becom to heora byrig þe wæs Gaza gehaten: þa wæron ða Philistei swiðe bliðe, and ymbsæton ða burh. Ac se stranga Samson arás on midre nihte, and gelæhte ða burh-geatu, and abær hi uppon ane dune, to bismere his gefaan. Se stranga Samson getacnode Crist, seo burh Gaza getacnode helle, and ða Philistei hæfdon Iudeisces folces getacnunge, þe besæton Cristes byrgene. Ac se Samson nolde gan ydel of ðære byrig, ac he abær ða gatu up to ðære dune; forðon þe {228} ure Hælend Crist tobræc helle-gatu, and generode Adam, and Euan, and his gecorenan of heora cynne, and freolice of deaðe arás, and hí samod, and astah to heofonum. Þa mánfullan he lét bæftan to ðam ecum witum. And is nu helle-geat belocen rihtwisum mannum, and æfre open unrihtwisum.