Crist cwæð to ðam apostolum, "Þæra manna synna þe ge forgyfað, þæra beoð forgifene; and ðam ðe ge ofteoð þa forgifenysse, ðam bið oftogen." Þisne anweald forgeaf Crist þam apostolum and eallum bisceopum, gif hí hit on riht healdað. Ac gif se bisceop deð be his agenum willan, and wile {234} bíndan þone únscyldigan, and þone scyldigan alysan, þonne forlyst hé ða mihte ðe him God forgeaf. Þam mannum he sceal dón synna forgifenysse, þe hé gesihð þæt beoð onbryrde ðurh Godes gife, and þam he sceal aheardian þe náne behreowsunge nabbað heora misdæda. Crist arærde of deaðe þone stincendan Lazarum, and þaþa hé cucu wæs, þa cwæð hé to his leorning-cnihtum, "Tolysað his bendas, þæt hé gán mæge." Þa alysdon hí þæs ge-edcucedan mannes bendas, þe Crist arærde to life. Forði sceolon ða láreowas ða unbindan fram heora synnum þa ðe Crist gelíffæst þurh onbryrdnysse. Ælc synful man þe his synna bediglað, he lið dead on byrgene; ac gif he his synna geandett þurh onbryrdnysse, þonne gæð he of þære byrgene, swa swa Lazarus dyde, þaða Crist hine arisan het: þonne sceal se lareow hine unbindan fram ðam ecum wíte, swa swa ða apostoli lichamlice Lazarum alysdon. Ac se læweda mann sceal him ondrædan þæs bisceopes cwyde, þeah hé unscyldig sy; þylæs ðe he ðurh modignysse scyldig weorðe. Ne getimode þam apostole Thome unforsceawodlice, þæt he ungeleafful wæs Cristes æristes, ac hit getimode þurh Godes forsceawunge; forðan ðurh his grapunge we sind geleaffulle. Mare ús fremode his tweonung þonne ðæra oðra apostola geleaffulnys; forðan ðaða hé wæs gebroht to geleafan mid ðære grapunge, þa wearð seo twynung þurh þæt ús ætbroden. Eaðe mihte Crist arisan of deaðe butan dolhswaðum, ac to ði he heold þa dolhswaðu, þæt he wolde mid þam þa twynigendan getrymman. He cwæð to Thoman, "Þu gelyfst, forðan ðe ðu me gesawe." He geseah ðone lichaman and þa dolhswaðu, and he gelyfde þæt he wæs God, seðe arærde þone lichaman of deaðe. Swiðe blissiað þas wórd ús þe her æfterfiliað, "Gesælige beoð þa þe me ne gesawon, and þeah on me gelyfað." Mid ðam cwyde sind þa ealle getacnode þe Crist on lichaman ne gesawon, and ðeah-hwæðere hine healdað on heora mode þurh geleafan. Se gelyfð soðlice on God, seðe mid weorcum begæð þæt þæt hé {236} gelyfð. Se ðe andet þæt hé God cunne, and yfele weorc begæð, þonne wiðsæcð he God mid þam weorcum. Se geleafa þe bið butan godum weorcum, se is dead. Þis sind ðæra apostola word, undernimað hí mid carfullum mode.