Nu trahtnað se papa Gregorius ðis godspel, and cwyð, þæt gehwá wundrað hu se Hælend become in to his apostolum, and wæron ðeah-hwæðere ða dura belocene. Nu cwyð eft se halga Gregorius, þæt Cristes lichama com inn, beclysedum durum, seðe wearð acenned of ðam mædene Marian beclysedum innoðe. Hwilc wundor is þæt se Hælend mid ecum lichaman come inn, belocenum durum, seðe mid deadlicum lichaman wearð acenned of beclysedum innoðe þæs mædenes? We rædað on ðære bec ðe is geháten Actus Apostolorum, þæt þa heafod-men Iudeisces folces gebrohton Cristes apostolas on cwearterne: þa on niht com him to Godes engel, and lædde hí út of ðam cwearterne, and stód on merigen þæt cweartern fæste belocen. God mæig dón ealle ðing: nu sceole we wundrian his mihte, and eac gelyfan. Þone lichaman he æteowde to grapigenne, þone ðe he inn-brohte beclysedum durum. His lichama wæs grapigendlic, and ðeah-hwæðere unbrosnigendlic; he æteowde hine grapigendlicne and unbrosnigendlicne, forðan ðe his lichama wæs þæs ylcan gecyndes ðe he ǽr wæs, ac wæs hwæðere þeah oðres wuldres. Se Hælend cwæð to him, "Beo sibb betwux eow." For sibbe com Crist to mannum, and sibbe he bead and tæhte, and nis nan ðing him gecweme þe bið butan sibbe gedón. {232} "Swa swa min Fæder sende me swa sende ic eow. Se Fæder lufað þone Sunu, ac ðeah-hwæðere he sende hine to ðrowunge for manna alysednysse." Crist lufode eac his apostolas, and ðeah-hwæðere ne sette he hí to cynegum, ne to ealdormannum, ne to woruldlicere blisse; ac tosende hí geond ealne middangeard, to bodigenne fulluht and ðone geleafan ðe he sylf tæhte. Þa bododon hí swa lange oð þæt þa ðweoran hí ofslogon, and hí ferdon sigefæste to heora Drihtne. Crist bleow on ða apostolas, and cwæð, "Onfoð Haligne Gast." Tuwa com se Halga Gast ofer ða apostolas; nu ǽne, and eft oðre siðe æfter Cristes upstige. Crist ableow þone Halgan Gast ofer ða apostolas, ða-gyt wunigende on eorðan, for ðære getacnunge, þæt ælc cristen mann sceal lufian his nextan swa swa hine sylfne. Eft siððan he to heofenum astáh, he sende þone ylcan Gast on fyres híwe ofer ða apostolas, to ði þæt we sceolon lufian God ofer ealle oðre ðing. An is se Halga Gast, þeah ðe he tuwa become ofer ða apostolas. Swa is eac án lufu, and twá bebodu, þæt we sceolon lufian God and men. Ac we sceolon geleornian on mannum hu we magon becuman to Godes lufe, swa swa Iohannes se apostol cwæð, "Se ðe ne lufað his broðor, þone ðe hé gesihð, hu mæg he lufian God, þone ðe he ne gesihð lichamlice?" Ær ðam fyrste wæs se Halga Gast wunigende on ðam apostolum, ac hí næron to ðan swiðe onbryrde, þæt hí mihton swa bealdlice Godes geleafan bodian, swa swa hí siððan mihton, þurh gife ðæs Halgan Gastes. Hí sæton beclysede, for ógan Iudeisces folces, on anum huse; ac syððan hí wæron gefyllede mid þam Halgum Gaste, hí wurdon swa gehyrte, and swa cene, þæt hí bodedon freolice Godes naman reðum cynegum and wælreowum.