Ne bepæce nán man hine sylfne, swa þæt he secge oððe gelyfe þæt ðry Godas syndon; oððe ænig hád on þære Halgan Þrynnysse sy unmihtigra þonne oðer. Ælc ðæra þreora is God, þeah-hwæðere hí ealle án God; forðan ðe hí ealle habbað án gecynd, and áne godcundnysse, and áne edwiste, and án geðeaht, and án weorc, and áne mægenðrymnysse, and gelíc wuldor, and efen-ece ríce. Is hwæðere se Sunu ana geflæschamod and geboren to men, of ðam halgan mædene Marian. Ne wearð se Fæder mid menniscnysse befangen, ac hwæðere hé asende his Sunu to ure alysednysse, and him æfre mid wæs, ægðer ge on life ge on ðrowunge, and on his æriste, and on his upstige. Eac eal Godes gelaðung andet, on ðam rihtum geleafan, þæt Crist is acenned of ðam clænan mædene Marian, and of ðam Halgan Gaste. Nis se Halga Gast þeah-hwæðere Cristes Fæder; ne nán cristen man þæt næfre ne sceal gelyfan: ac se Halga Gast is Willa þæs Fæder and ðæs Suna; forði þonne swiðe rihtlice is awriten on urum geleafan, þæt Cristes menniscnys wearð gefremmed þurh ðone Halgan Willan. Beheald þas sunnan mid gleawnysse, on ðære is, swa we ær cwædon, hætu and beorhtnys; ac seo hætu drygð, and {286} seo beorhtnys onlyht. Oðer ðing deð seo hætu, and oðer seo beorhtnys; and ðeah ðe hí ne magon beon totwæmde: belimpð, hwæðere ðeah, seo hæðung to ðære hætan, and seo onlihting belimpð to ðære beorhtnysse. Swa eac Crist ana underfeng ða menniscnysse, and na se Fæder, ne se Halga Gast: þeah-hwæðere hí wæron æfre mid him on eallum his weorcum and on ealre his fare. We sprecað ymbe God, deaðlice be Undeaðlicum, tyddre be Ælmihtigum, earmingas be Mildheortum; ac hwá mæg weorðfullice sprecan be ðam ðe is únasecgendlic? He is butan gemete, forðy ðe he is æghwær. He is butan getele, forðon ðe he is æfre. He is butan héfe, forðon þe he hylt ealle gesceafta butan geswince; and he hí ealle gelogode on þam ðrim ðingum, þæt is on gemete, and on getele, and on héfe. Ac wite ge þæt nán man ne mæg fullice embe God sprecan, þonne we furðon þa gesceafta þe he gesceop ne magon asmeagan, ne areccan. Hwá mæg mid wordum ðære heofenan freatewunge asecgan? Oððe hwá ðære eorðan wæstmbærnysse? Oððe hwá herað genihtsumlice ealra tida ymbhwyrft? Oððe hwá ealle oðre ðing, þonne we furðon þa lichomlican ðing, þe we onlociað, ne magon fullice befón mid ure gesihðe? Efne ðu gesihst ðone mannan beforan ðe, ac on ðære tide þe ðu his neb gesihst, þu ne gesihst na his hricg. Ealswa, gif ðu sumne clað sceawast, ne miht ðu hine ealne togædere geseon, ac wenst abutan, þæt ðu ealne hine geseo. Hwylc wundor is, gif se Ælmihtiga God is unasecgendlic and unbefangenlic, seðe æghwær is eall, and nahwar todæled?