Æfre wæs se Fæder, butan anginne; and æfre wæs se Sunu mid þam Fæder, forðan ðe he is þæs Fæder Wisdom; æfre wæs se Halga Gast, seðe is heora beigra Willa and Lufu. Nis se Fæder of nanum oðrum, ac he wæs æfre. Se Sunu is acenned of ðam Fæder, ac he wæs æfre on ðæs Fæder {282} bosme, forðan ðe he is his Wisdom, and he is of ðam Fæder eal þæt he is. Æfre wæs se Halga Gast, forðan ðe he is, swa we ǽr cwædon, Willa and soð Lufu þæs Fæder and ðæs Suna; soðlice willa and lufu getacniað an ðing: þæt þæt þu wylt, þæt ðu lufast; and þæt þæt ðu nelt, þæt ðu ne lufast. Seo sunne ðe ofer us scinð is lichamlic gesceaft, and hæfð swa-ðeah ðreo agennyssa on hire: an is seo lichamlice edwist, þæt is ðære sunnan trendel; oðer is se leoma oððe beorhtnys æfre of ðære sunnan, seoðe onliht ealne middangeard; þridde is seo hætu, þe mid þam leoman cymð to ús. Se leoma is æfre of ðære sunnan, and æfre mid hire; and ðæs Ælmihtigan Godes Sunu is æfre of ðam Fæder acenned, and æfre mid him wunigende; be ðam cwæð se apostol, þæt he wære his Fæder wuldres beorhtnys. Ðære sunnan hætu gæð of hire and of hire leoman; and se Halga Gast gæð æfre of ðam Fæder and of þam Suna gelice; be ðam is þus awriten, "Nis nán þe hine behydan mæge fram his hætan." Fæder, and Sunu, and Halig Gast ne magon beon togædere genamode, ac hí ne beoð swa-þeah nahwár totwæmede. Nis se Ælmihtiga God na ðryfeald, ac is Ðrynnys. God is se Fæder, and se Sunu is God, and se Halga Gast is God: na ðry Godas, ac hí ealle ðry án Ælmihtig God. Se Fæder is eac wisdom of nanum oðrum wisdome. Se Sunu is wisdom of ðam wisan Fæder. Se Halga Gast is wisdom. Ac ðeah-hwæðere hí sind ealle ætgædere án wisdom. Eft se Fæder is soð lufu, and se Sunu is soð lufu, and se Halga Gast is soð lufu; and hí ealle ætgædere án God and án soð lufu. Eac swilce is se Fæder gast and halig, and se Sunu is gast and halig untwylice; þeah-hwæðere se Halga Gast is synderlice geháten Halig Gast, þæt þæt hí ealle ðry sind gemænelice. Swa micel gelicnys is on ðyssere Halgan Ðrynnysse, þæt se Fæder nis na mare þonne se Sunu on ðære Godcundnysse; {284} ne se Sunu nis na mare þonne se Halgan Gast; ne nan heora án nis na læsse þonne eall seo Ðrynnys. Swa hwær swa heora án bið, þær hí beoð ealle ðry, æfre án God untodæledlic. Nis heora nán máre þonne oðer, ne nán læssa ðonne oðer; ne nán beforan oðrum, ne nán bæftan oðrum; forðan swa hwæt swa læsse bið þonne God, þæt ne bið na God; þæt þæt lator bið, þæt hæfð anginn, ac God næfð nán anginn. Nis na se Fæder ana Ðrynnys, oððe se Sunu Ðrynnys, oððe se Halga Gast Ðrynnys, ac þas ðry hadas sindon án God on anre Godcundnysse. Þonne ðu gehyrst nemnan þone Fæder, þonne understenst ðu þæt he hæfð Sunu. Eft, þonne þu cwyst Sunu, þu wast, butan tweon, þæt he hæfð Fæder. Eft, we gelyfað þæt se Halga Gast is ægðer ge ðæs Fæder ge ðæs Suna Gast.