"Ðaða hi up to heofonum starigende stodon, ða gesawon hi ðær twegen englas on hwitum gerelan, þus cweðende, Ge Galileisce weras, hwi stande ge ðus starigende wið heofenas weard? Se Hælend, þe is nu genumen of eowrum gesihðum to heofonum, swa he cymð eft swa swa ge gesawon þæt he to heofonum astáh. Hi ða gecyrdon to ðære byrig Hierusalem mid micelre blisse, and astigon upp on ane upfleringe, and þær wunedon oð Pentecosten on gebedum and on Godes herungum, oðþæt se Halga Gast him to com, swa swa se æðela Cyning him ær behét." "On ðyssere geferrædene wæron Petrus and Iohannes, Iacob and Andreas, Philippus and Thomas, Bartholomeus and Matheus, se oðer Iacob and Simon, se oðer Iudas and Maria þæs Hælendes modor, and gehwilce oðre, ægðer ge weras ge wíf. Eal seo menigu wæs an hund manna and twentig, anmodlice on gebedum wunigende." Se Hælend tæhte ða halgan lare his leorning-cnihtum ær his ðrowunge, and æfter his æriste he wæs wunigende betwux him þas feowertig daga, fram ðære halgan Easter-tide oð þisne dægðerlican dæg, and on manegum wisum ðrafode and afandode his gingran, and ge-edlæhte þæt þæt he ær tæhte, to fulre lare and rihtum geleafan. He gereordode hine æfter his æriste, na forði þæt he syððan eorðlices bigleofan behófode, ac to ði þæt he geswutelode his soðan lichaman. He æt þurh mihte, na for neode. Swa swa fyr fornimð wæteres dropan, swa fornam Cristes godcundlice miht ðone geðigedan mete. Soðlice æfter ðam gemænelicum æriste ne behófiað ure lichaman nanre strangunge eorðlicra metta, ac se Hælend us deð ealle ure neoda mid heofenlicum ðingum, and we beoð mid wuldre gewelgode, and mihtige to gefremmenne swa hwæt swa us licað, and we beoð ful swyfte to farenne geond ealle wídgylnyssa Godes rices. {298} He behét his gingrum nu and gelome þæt he wolde him sendan þone Halgan Gast, and þus cwæð, "Þonne he cymð he eow tiht and gewissað to eallum ðam ðingum ðe ic eow sæde." Þa com se Halga Gast on fyres hiwe to ðam halgum hyrede on þam endleoftan dæge Cristes upstiges, and hi ealle onælde mid úndergendlicum fyre, and hí wurdon afyllede mid þære heofonlican láre, and cuðon ealle woruldlice gereord, and bodedon unforhtlice geleafan and fulluht ricum and reðum. Se halga heap befrán Crist, hwæðer he wolde on ðam timan þisne middangeard geendian. He ða cwæð him to andsware, "Nis na eower mǽð to witenne þone timan, þe min Fæder þurh his mihte gesette." He cwæð eac on oðre stowe, "Nát nán man ðone dæg ne ðone timan ðysre worulde geendunge, ne englas, ne nan halga, buton Gode anum." Þeah-hwæðere, be ðam tacnum þe Crist sæde, we geseoð þæt seo geendung is swiðe gehende, þeah ðe heo us uncuð sy.