Þa apostoli wæron gewitan Cristes weorca, forðan ðe hí bodedon his ðrowunge, and his ærist, and upstige, ærst Iudeiscre ðeode, and syððan becom heora stemn to ælcum lande, and heora word to gemærum ealles ymbhwyrftes; forðan ðe hí awriton Cristes wundra, and ða bec þurhwuniað on cristenre ðeode, ægðer ge ðær þær ða apostoli lichamlice bodedon, ge þær ðær hí na ne becomon. Ealle gesceafta ðeniað heora Scyppende. Þaþa Crist acenned wæs, þa sende seo heofen niwne steorran, ðe bodade Godes acennednysse. Eft, ðaða he to heofonum astah, þa abeah þæt heofonlice wolcn wið his, and hine underfeng: na þæt þæt wolcn hine ferede, forðan ðe he hylt heofona ðrymsetl, ac he siðode mid þam wolcne of manna gesihðum. Þær wæron ða gesewene twegen englas on hwitum gyrelum. Eac swilce on his acennednysse wæron englas gesewene; ac þæt halige godspel ne ascyrde hu hi gefreatwode wæron; forðan ðe God com to us swiðe eadmod. On his upstige wæron gesewene englas mid hwitum gyrlum geglengede. Bliss is {300} getacnod on hwitum reafe, forðon ðe Crist ferde heonon mid micelre blisse and mid micclum ðrymme. On his acennednysse wæs geðuht swilce seo Godcundnys wære geeadmet, and on his upstige wæs seo menniscnys ahafen and gemærsod. Mid his upstige is adylegod þæt cyrographum ure geniðerunge, and se cwyde ure brosnunge is awend. Þaða Adam agylt hæfde, þa cwæð se Ælmihtiga Wealdend him to, "Þu eart eorðe, and þu gewenst to eorðan. Ðu eart dust, and þu gewenst to duste." Nu to-dæg þæt ylce gecynd ferde unbrosnigendlic into heofenan rice. Þa twegen englas sædon þæt Crist cymð swa swa he uppferde, forðan ðe he bið gesewen on ðam micclum dome on menniscum hiwe, þæt his slagan hine magon oncnawan, þe hine ær to deaðe gedydon, and eac ða ðe his lare forsawon, þæt hi ðonne rihtlice onfón þæt ece wite mid deofle. Þæt halige gewrit cwyð, "Tollatur impius ne uideat gloriam Dei:" "Sy ðam arleasan ætbroden seo gesihð Godes wuldres." Ne geseoð þa arleasan Cristes wuldor, ðe hine ær on life forsawon, ac hi geseoð þonne egefulne þone ðe hi eadmodne forhygedon. Recumbentibus undecim discipulis: et reliqua. We habbað nu geræd Lucas gesetnysse embe Cristes upstige; nu wende we ure smeagunge to ðam oðrum godspellere Marcum, þe cwæð on ðisum dægðerlicum godspelle, þæt se Hælend æteowde hine sylfne his apostolum and cidde him, forðan ðe hi noldon æt fruman gelyfan his æristes of deaðe, ðaða hit him gecydd wæs. Þa cwæð se Wealdend to his gingrum, "Farað geond ealne middangeard, and bodiað godspel eallum gesceafte: seðe gelyfð and bið gefullod, se bið gehealden; se ðe ne gelyfð, he bið genyðerod. Ðas tacnu fyligað þam mannum þe gelyfað," etc. Þis godspel is nu anfealdlice gesǽd, ac we willað nu, æfter Gregories trahtnunge, þa digelnysse eow onwreón.