Se Halga Gast becom tuwa ofer ða apostolas. Crist ableow ðone Halgan Gast upon ða apostolas ǽr his upstige, þus cweðende, "Onfoð Haligne Gast." Eft, on ðisum dæge, asende se Ælmihtiga Fæder and se Sunu heora begra Gast to ðam geleaffullan heape, on ðysre worulde wunigende. Se Hælend ableow his Gast on his gingran, for ðære getacnunge {326} þæt hí and ealle cristene men sceolon lufigan heora nehstan swa swa hí sylfe. He sende eft, swa swa hé ǽr behet, ðone ylcan Gast of heofonum, to ði þæt we sceolon lufian God ofer ealle oðre ðing. An is se Halga Gast, þeah ðe he tuwa become ofer ða apostolas. Swa is eac án lufu and twa bebodu, Þæt we sceolon lufian God and menn. Ac we sceolon leornian on mannum hu we magon becuman to Godes lufe, swa swa Iohannes se apostol cwæð, "Se ðe ne lufað his broðor, ðone ðe he gesihð, hu mæg hé lufian God, þone þe he ne gesihð lichamlice?" We wurðiað þæs Halgan Gastes to-cyme mid lofsangum seofon dagas, forðan ðe he onbryrt ure mód mid seofonfealdre gife, þæt is, mid wisdome and andgyte, mid geðeahte and strencðe, mid ingehyde and arfæstnysse, and he us gefylð mid Godes ege. Se ðe þurh gode geearnunga becymð to ðissum seofonfealdum gifum þæs Halgan Gastes, he hæfð þonne ealle geðincðe. Ac se ðe wile to ðisre geðincðe becuman, he sceal gelyfan on ða Halgan Ðrynnysse, and on Soðe Annysse, þæt se Fæder, and his Sunu, and heora begra Gast syndon ðry on hadum, and án God untodæledlic, on anre Godcundnysse wunigende. Þysne geleafan getacnodon ða ðreo ðusend þe ærest gebugon to geleafan, æfter ðæs Halgan Gastes to-cyme. Swa swa ða ðreo þusend wæron án werod, swa is seo Halige Ðrynnys án God. And þæt werod wæs swa ánmod swilce him eallum wære án heorte and án sawul; forðan ðe þære Halgan Þrynnysse is án godcundnyss, and án gecynd, and án willa, and án weorc unascyrigendlice. Þa geleaffullan brohton heora feoh, and ledon hit æt ðæra apostola foton. Mid þam is geswutelod þæt cristene men ne sceolon heora hiht besettan on woroldlice gestreon, ac on Gode anum. Se gítsere ðe beset his hiht on his goldhord, he bið swa swa se apostol cwæð, "þam gelíc þe deofolgyld begæð." Hi heoldon þæt gold unwurðlice, forðan ðe seo gitsung næfde nænne stede on heora heortan: forði hí dydon heora {328} ðing him gemæne, þæt hí on soðre sibbe butan gytsunge beon mihton. Hí setton heora handa ofer geleaffulle men, and him com to se Halga Gast ðurh heora biscepunge. Biscopas sind þæs ylcan hádes on Godes gelaðunge, and healdað þa gesetnysse on heora biscepunge, swa þæt hí settað heora handa ofer gefullude menn, and biddað þæt se Ælmihtiga Wealdend him sende ða seofonfealdan gife his Gastes, seðe leofað and rixað á butan ende. Amen. FOR THE HOLY DAY OF PENTECOST.