Nis na se Halga Gast wunigende on his gecynde, swa swa hé gesewen wæs, forðan ðe he is ungesewenlic; ac for ðære getacnunge, swa we ær cwædon, he wæs æteowod on culfran, and on fyre. He is gehaten on Greciscum gereorde, Paraclitus, þæt is, Frofor-gast, forði ðe he frefrað þa dreorian, þe heora synna behreowsiað, and sylð him forgyfenysse hiht, and heora unrotan mód geliðegað. He forgyfð synna, and he is se weg to forgyfenysse ealra synna. He sylð his gife ðam ðe he wile. Sumum men he forgifð wisdom and spræce, sumum gód ingehyd, sumum micelne geleafan, sumum mihte to gehælenne untruman, sumum witegunge, sumum toscead godra gasta and yfelra; sumum he forgifð mislice gereord, sumum gereccednysse mislicra spræca. Ealle ðas ðing deð se Halga Gast, todælende æghwilcum be ðam ðe him gewyrð; forðam ðe he is Ælmihtig Wyrhta, and swa hraðe swa he þæs mannes mod onliht, he hit awent fram yfele to gode. He onlihte Dauides heortan, ðaða he on iugoðe hearpan lufode, and worhte hine to psalm-wyrhtan. Amos hatte sum hryðer-hyrde, þone awende se Halga Gast to mærum {324} witegan. Petrus wæs fiscere, þone awende se ylca Godes Gast to apostole. Paulus ehte cristenra manna, þone he geceas to lareowe eallum ðeodum. Matheus wæs tollere, þone he awende to godspellere. Þa apostoli ne dorston bodian þone soðan geleafan, for ógan Iudeisces folces; ac siððan hí wæron onælede þurh ðone Halgan Gast, hí forsawon ealle lichamlice pinunga, and orsorhlice Godes mærða bodedon. Þyses dæges wurðmynt is to mærsigenne, forðan ðe se Ælmihtiga God, þæt is se Halga Gast, gemedemode hine sylfne þæt he wolde manna bearn on ðisre tide geneosian. On Cristes acennednysse wearð se Ælmihtiga Godes Sunu to menniscum men gedon, and on ðisum dæge wurdon geleaffulle men godas, swa swa Crist cwæð, "Ic cwæð, Ge sind godas, and ge ealle sind bearn þæs Hehstan." Þa gecorenan sind Godes bearn, and eac godas, na gecyndelice, ac ðurh gife þæs Halgan Gastes. An God is gecyndelice on ðrim hadum, Fæder, and his Sunu, þæt is his Wisdom, and se Halga Gast, seðe is heora begra Lufu and Willa. Heora gecynd is untodæledlic, æfre wunigende on anre Godcundnysse. Se ylca cwæð þeah-hwæðere be his gecorenum, "Ge sint godas." Þurh Cristes menniscnysse wurdon menn alysede fram deofles ðeowte, and ðurh to-cyme þæs Halgan Gastes, mennisce men wurdon gedone to godum. Crist underfeng menniscnysse on his to-cyme, and men underfengon God þurh neosunge þæs Halgan Gastes. Se man ðe næfð Godes Gast on him nis hé Godes. Ælces mannes weorc cyðað hwilc gast hine wissað. Godes Gast wissað symble to halignysse and gódnysse; deofles gast wissað to leahtrum and to mándædum.