Nu cweð se halga Gregorius, þæt sum arwurðe munuc wæs on ðam earde Licaonia, swiðe eawfæst, his nama wæs Martirius. Se ferde, be his abbudes hæse, to sumum oðrum mynstre, on his ærende: ða gemette he be wege sumne lic-ðrowere licgende eal tocínen, and nahte his feðes geweald: cwæð þæt he wolde genealæcan his hulce, gif he mihte. Þa ofhreow ðam munece þæs hreoflian mægenleast, and bewand hine mid his cæppan and bær to mynstreweard. Þa wearð his abbude geswutelod hwæne he bær, and hrymde mid micelre stemne, and cwæð, "Yrnað, yrnað, and undoð þæs mynstres geat ardlice, forðan ðe ure broðor Martyrius berð þone Hælend on his bæce." Þaða se munuc genealæhte ðæs mynstres geate, þa wánd se of his swuran þe wæs hreoflig geðuht, and wearð gesewen on Cristes gelicnysse. Ða beseah se munuc up, and beheold hu he to heofonum astah. Þa cwæð se Hælend mid ðam upstige, "Martíri, ne sceamode ðe mín ofer eorðan, ne me ne sceamað þin on heofonum." Þa efste se abbud wið þæs muneces, and neodlice cwæð, "Broðor min, hwær is se ðe ðu feredest?" He cwæð, "Gif ic wiste hwæt he wære, ic wolde licgan æt his fotum. Þaða ic hine bær ne gefredde ic nanre byrðene swærnysse." Hu mihte hé gefredan æniges hefes swærnysse, ðaða he ðone ferode ðe hine bær? Nu cweð se halga Gregorius, þæt se Hælend ða geseðde ðone cwyde þe he sylf cwæð, "Þæt þæt ge doð þearfum on minum naman, þæt ge doð me sylfum." Hwæt is on menniscum gecynde swa mærlic swa Cristes menniscnys? and hwæt is atelicor geðuht on menniscum gecynde þonne is ðæs hreoflian líc, mid toðundennesse, and springum, and reocendum stence? Ac se ðe is arwurðful ofer ealle gesceafta, he gemedemode hine sylfne þæt he wære gesewen on ðam atelican híwe, to ði þæt we sceolon besargian {338} menniscra manna yrmðe, and be ure mihte gefrefrian, for lufe ðæs mildheortan and ðæs eadmodan Hælendes; þæt he us getiðige wununge on his rice to ecum life, seðe us ahredde fram deofles hæftnydum; seðe rixað on ecnysse mid þam Ælmihtigan Fæder and þam Halgan Gaste, hi ðry on anre Godcundnysse wunigende, butan anginne and ende, á on worulde. Amen. THE SECOND SUNDAY AFTER PENTECOST. Homo quidam erat dives: et reliqua. The Sovereign Lord spake this parable to his disciples, thus saying, "There was a certain rich man adorned with purple and fine linen, and daily lived sumptuously. A certain poor man lay at his gate, and his name was Lazarus, who was a leper," etc.