Þa synfullan geseoð nu hwiltidum ða gecorenan on wuldre, ðe hi forsawon on worulde, þæt seo angsumnys heora modes ðe mare sy: and ða rihtwisan symle geseoð ða unrihtwisan on heora tintregum cwylmigende, þæt heora bliss ðe mare sy, and lufu to heora Drihtne, þe hi ahredde fram deofles anwealde, and fram ðam mánfullum heape. Ne astyrað þæra rihtwisra gesihð him nænne ógan, ne heora wuldor ne wanað; forðan ðe ðær ne bið nán besargung ðæra mánfulra yrmðe, ac heora tintrega becymð þam gecorenum to maran blisse, swa swa on metinge bið forsewen seo blace anlicnys, þæt seo hwite sy beorhtre gesewen. Þa gecorenan geseoð symle heora Scyppendes beorhtnysse, and forði nis nan ðing on gesceaftum him bediglod. Se welega nolde on life gehyran ðone lareow Moysen, ne Godes witegan: ða wende he eac þæt his gebroðra hí woldon forseon, swa swa he dyde, and gyrnde forði þæt Lazarus hí moste warnigan, þæt hí ne becomon to his susle. Se heahfæder him andwyrde, "Gif hi forseoð Moyses ǽ and ðæra witegena bodunga, nellað hí gelyfan, þeah hwá of deaðe arise." Þa ðe forgimeleasiað þa eaðelican beboda þære ealdan ǽ, hu willað hí ðonne gehyrsumian þam healicum bebodum Cristes lare, ðe of deaðe arás? Ic bidde eow, mine gebroðra, þæt ge beon gemyndige ðæs Lazares reste and ðæs rican wite, and doð swa swa Crist sylf tæhte, "Tiliað eow freonda on Godes ðearfum, þæt hí on eowrum geendungum onfon eow into ecum eardung-stowum." Manega Lazaras ge habbað nu licgende æt eowrum gatum, biddende eowre oferflowendnysse. Ðeah ðe hí syn wáclice geðuhte, þeah-hwæðere hí beoð eft eowre ðingeras wið ðone Ælmihtigan. Soðlice we sceoldon beodan þam ðearfum þæt hí us biddað, forðan ðe hí beoð ure mundboran, þa ðe nu wædligende æt us bigleofan wilniað. Ne sceole we forseon {336} heora wácnysse, forðan ðe Criste bið geðenod þurh ðearfena anfenge, swa swa he sylf cwæð, "Me hingrode, and ge me gereordodon; me ðyrste, and ge me scencton; ic wæs nacod, and ge me scryddon."