Þas word sind digle, ac se trahtnere Gregorius us geopenode þæt gastlice andgit. Mine gebroðra þa leofostan, ge gehyrdon on ðyssere godspellican rædinge, þæt ða synfullan genealæhton to ðæs Hælendes spræce, and eac to his gereorde; and ða Iudeiscan boceras mid héte þæt tældon: ac heora tál næs na of rihtwisnysse, ac of niðe. Hi wæron untrume, ðeah ðe hi ðæs ne gymdon. Þa wolde se heofenlica læce mid geswæsum bigspelle þæt geswell heora heortan welwyllendlice gelacnian, and ðus cwæð, "Hwilc eower hæfð hund-teontig sceapa, and gif he forlysð án ðæra sceapa, ðonne forlæt he ða nigon and hund-nigontig on westene, and gæð secende þæt án ðe him losode?" Hundfeald getel is fulfremed, and se Ælmihtiga hæfde hund-teontig sceapa, ðaða engla werod and mancynn wæron his æhta: ac him losode án sceap, ðaða se frumsceapena mann Adam syngigende forleas neorxena-wanges bigwiste. Þa forlet se Ælmihtiga Godes Sunu eal engla werod on heofonum, and ferde to eorðan, and sohte þæt {340} án sceap ðe him ætwunden wæs. Ðaða he hit gemette, he hit bær on his exlum to ðære eowde blissigende. Þaða he underfeng ure mennisce gecynd, and ure synna abær, þa wæs þæt dweligende sceap ongean fered on his halgum exlum. Ðæra sceapa hlaford com ham, afundenum sceape; forðan ðe Crist, æfter ðære ðrowunge, ðe he mancyn mid alysde, arás of deaðe, and astah to heofonum blissigende. He gelaðode his frynd and his nehgeburas. His frynd sind engla heapas, forðan ðe hi healdað on heora staðelfæstnysse singallice his willan. Hi sind eac his nehgeburas, forðan ðe hi brucað þære wulderfullan beorhtnysse his gesihðe on heora andweardnysse. He cwæð, "Blissiað mid me, forðan ðe ic gemette min forlorene sceap." Ne cwæð he, 'Blissiað mid þam sceape,' ac 'mid me,' forðan ðe ure alysednys soðlice is his bliss; and ðonne we beoð to ðære heofonlican eardung-stowe gelædde, þonne gefylle we ða micclan mærsunge his gefean. He cwæð, "Ic secge eow, mare bliss bið on heofonum be anum synfullan men, gif he his synna mid dǽdbote behreowsað, ðonne sy be nigon and hund-nigontig rihtwisum ðe nanre behreowsunge ne behofiað." Þis is to smeagenne, hwi sy mare bliss be gecyrredum synfullum, þonne be unscyldigum rihtwisum.