We habbað gelomlice gesewen, þæt gehwylce gebroðra, ðe ne befeollon on healice gyltas, þæt hí ne beoð ealles swa carfulle to beganne ða earfoðlican drohtnunge, swilce hi orsorge beon, forðan ðe hi ða healican leahtras ne gefremedon; and gehwilce oðre ðe oncnawað þa swæran gyltas ðe hi on geogoðe adrugon, beoð mid micelre sarnysse onbryrde. Hi forseoð alyfedlice ðing and gesewenlice, and mid wope gewilniað þa ungesewenlican and ða heofonlican. Hí forseoð hí sylfe, and geeadmettað on eallum ðingum; and forði ðe hí dweligende fram heora Scyppende gewiton, hí willað geinnian ða æftran hinðe mid þam uferan gestreonum. Mare bliss bið on heofonum be ðam gecyrredum synfullum, ðurh swilce drohtnunga, þonne sy be ðam asolcenum þe truwað be him sylfum þæt he {342} lytle and feawa gyltas gefremode, and eac hwonlice carað ymbe Godes beboda and his sawle ðearfe. Maran lufe nimð se heretoga on gefeohte to ðam cempan, þe æfter fleame his wiðerwinnan ðegenlice oferwinð, þonne to ðam þe mid fleame ne ætwánd, ne ðeah on nanum gecampe naht ðegenlices ne gefremode. Ealswa se yrðling lufað ðone æcer, ðe æfter ðornum and bremelum genihtsume wæstmas agifð, swiðor þonne he lufige ðone ðe ðornig næs, ne wæstmbære ne bið. Sind ðeah-hwæðere forwel mænige rihtwise unscyldige wið heafod-leahtras, and habbað hwæðere ealswa stiðe drohtnunge swylce hi mid eallum synnum geancsumede wæron. Þam ne mæg nan dǽdbeta beon geefenlæht, forðan ðe hí sind rihtwise and behreowsigende. Be ðam is to smeagenne hu micclum se rihtwisa mid eadmodre heofunge God gegladige, gif se unrihtwisa mid soðre dǽdbote hine gegladian mæg. Drihten rehte ða-gyt oðer bígspel be tyn scyllingum, and ðæra án losode and wearð gemet. Þæt bígspel getacnað eft nigon engla werod. To ðam teoðan werode wæs mancyn gesceapen; forðan ðe þæt teoðe wearð mid modignysse forscyldigod, and hi ealle to awyrgedum deoflum wurdon awende, and of ðære heofonlican blisse to helle suslum bescofene. Nu sind ða nigon heapas genemnede, angeli, archangeli, uirtutes, potestates, principatus, dominationes, throni, cherubin, seraphin. Þæt teoðe forwearð. Þa wæs mancynn gesceapen to ge-edstaðelunge ðæs forlorenan heapes.