We sædon litle ær on ðisre rædinge, þæt þæs Ælmihtigan ðrymsetl wære betwux ðam werode ðe sind throni gecigede: ac hwá mæg beon eadig, buton he his Scyppendes wununge on him sylfum hæbbe? Seraphim sind ða gastas gecigede, ðe beoð on Drihtnes lufe byrnende, and ðeah-hwæðere eal þæt heofonlice mægen samod beoð onælede mid his lufe. Cherubim is gecweden gefyllednys ingehydes oððe gewittes, and ðeah hwilc engel is on Godes andwerdnysse ðe ealle ðing nyte? Ac forði is gehwilc ðæra weroda þam naman geciged, ðe ða gife getacnað þe he fulfremedlicor underfeng. Ac uton suwian hwæthwega be ðam digelnyssum ðæra heofenlicra ceastergewarena, and smeagan be us sylfum, and geomrian mid behreowsunge ure synna, þæt we, ðurh Drihtnes mildheortnysse, ða heofonlican wununge, swa swa he us behét, {350} habban moton. He cwæð on sumere stowe, "On mines Fæder huse sind fela wununga;" forðan gif sume beoð strengran on geearnungum, sume rihtwisran, sume mid maran halignysse geglengede, þæt heora nan ne beo geælfremod fram ðam micclan huse, þær ðær gehwilc onfehð wununge be his geearnungum. Se miltsienda Drihten cwæð, þæt micel blis wære on heofonum be anum dǽdbetan; ac se ylca cwæð þurh his witegan, "Gif se rihtwisa gecyrð fram his rihtwisnysse, and begæð unrihtwisnysse arleaslice, ealle his rihtwisnysse ic forgyte; and gif se arleasa behreowsað his arleasnysse, and begæð rihtwisnysse, ne gemune ic nanra his synna." Behreowsigendum mannum he miltsað, ac hé ne behét þam elcigendum gewiss líf oð merigen. Nis forði nanum synfullum to yldigenne agenre gecyrrednysse, ðylæs ðe he mid sleacnysse forleose ða tíd Godes fyrstes. Smeage gehwilc man his ærran dæda, and eac his andweardan drohtnunge, and fleo to ðam mildheortan Deman mid wópe, ða hwile ðe he anbidað ure betrunge, seðe is rihtwis and mildheort. Soðlice behreowsað his gedwyld seðe ne ge-edlæhð þa ærran dæda; be ðam cwæð se Hælend to ðam gehæledan bedredan, "Efne nu ðu eart gehæled, ne synga ðu heonon-forð, þylæs ðe ðe sum ðing wyrse gelimpe." Geleaffullum mannum mæg beon micel truwa and hopa to ðam menniscum Gode Criste, seðe is ure Mundbora and Dema, seðe leofað and rixað mid Fæder, on annysse þæs Halgan Gastes, on ealra worulda woruld. Amen. THE FOURTH SUNDAY AFTER PENTECOST. The holy gospel tells us, that "publicans and sinners approached Jesus, and desired to hear his doctrine. Then the pharisees and the scribes of the Jewish people murmured, because Jesus received the sinful, and ate and drank with them. Then said Jesus to the Jewish scribes this parable, Which of you hath an hundred sheep," etc.