On sumum gecorenum mannum, ðe mid micelre gimene on andweardum life drohtniað, bið Godes Gastes gifu swa micel, þæt he on heora heortan swilce on ðrimsetle sittende toscǽt and démð wundorlice oðra manna dæda. Hwæt sind þas buton ðrymsetl heora Scyppendes, on ðam ðe he wunigende mannum démð? Seo soðe lufu is gefyllednys Godes ǽ, and se ðe on his ðeawum hylt Godes lufe and manna, he bið þonne cherubim rihtlice geháten; forðan ðe eal gewitt and ingehyd is belocen on twam wordum, þæt is Godes lufu and manna. Sume Godes ðeowan sind onælede mid swa micelre gewilnunge heora Scyppendes neawiste, þæt hi forseoð ealle woruldlice ymbhydignysse, and mid byrnendum mode ealle ða ateorigendlican geðincðu oferstigað, and mid ðam micclan bryne ðære heofenlican lufe oðre ontendað, and mid larlicre spræce getrymmað. Hu magon ðas beon gecigede buton seraphim, þonne hi ðurh ðone micclan bryne Godes lufe sind toforan oðrum eorðlicum his neawiste gehendost? Nu cweð se eadiga Gregorius, "Wa ðære sawle ðe orhlyte hyre lif adrihð þæra haligra mihta," þe we nu sceortlice eow gerehton. Ac seo ðe bedæled is þam godnyssum, heo geomrige and gewilnige þæt se cystiga Wealdend þurh his gife hí geðeode þam hlyte his gecorenra. Nabbað ealle menn gelice gife æt Gode, forðan ðe he forgifð ða gastlican geðincðu ælcum be his gecneordnyssum. Se ðe læssan gife hæbbe, ne ándige he on ðam foreðeondum, forðan ðe ða halgan ðreatas ðæra eadigra engla sind swa geendebyrde, þæt hi sume mid underþeodnysse oðrum hyrsumiað, and sume mid oferstigendre wurðfulnysse ðam oðrum sind foresette. {348} Micel getel is ðæra haligra gasta, þe on Godes rice eardiað, be ðam cwæð se witega Daniel, "Þusend ðusenda ðenodon þam Heofonlican Wealdende, and ten ðusend siðan hundfealde ðusenda him mid wunodon." Oðer is ðenung, oðer is mid-wunung. Þa englas ðeniað Gode þe bodiað his willan middangearde, and ða ðing gefyllað þe him liciað. Ða oðre werod, þe him mid wuniað, brucað þære incundan embwlátunge his godcundnysse, swa þæt hí nateshwon fram his andweardnysse asende ne gewitað. Soðlice ða ðe to us asende becumað, swa hí gefremmað heora Scyppendes hæse wiðutan, þæt hi ðeah-hwæðere næfre ne gewitað fram his godcundan myrhðe; forðam ðe God is æghwær, þeah ðe se engel stowlic sy. Nis se Ælmihtiga Wealdend stowlic, forðan ðe he is on ælcere stowe, and swa hwider swa se stowlica engel flihð, he bið befangen mid his andwerdnysse. Hi habbað sume synderlice gife fram heora Scyppende, and ðeah-hwæðere heora wurðscipe him bið eallum gemæne, and þæt þæt gehwilc on him sylfum be dæle hæfð, þæt he hæfð on oðrum werode fulfremodlice; be ðam cwæð se sealm-wyrhta, "Drihten, ðu ðe sitst ofer cherubin, geswutela ðe sylfne."