Fela witegan mid heora witegunge bodedon Drihten toweardne, sume feorran sume neán, ac Iohannes his to-cyme mid wordum bodade, and eac mid fingre gebicnode, ðus cweðende, "Loca nu! Efne her gæð Godes Lamb, seðe ætbret middangeardes synna." Crist is manegum naman genemned. He is Wisdom geháten, forðan ðe se Fæder ealle gesceafta þurh hine geworhte. He is Word gecweden, forðan þe word is wisdomes geswutelung. Be ðam Worde ongann se godspellere Iohannes þa godspellican gesetnysse, ðus cweðende, "On frymðe wæs Word, and þæt Word wæs mid Gode, and þæt Word wæs God." He is Lamb geháten, for ðære unscæððignysse lambes gecyndes; and wæs unscyldig, for ure alysednysse, his Fæder liflic onsægednys, on lambes wisan geoffrod. He is Leo geciged of Iudan mægðe, Dauides wyrtruma, forðan ðe he, ðurh his godcundlican strencðe, þone miclan deofol mid sige his ðrowunge oferswiðde. Se halga Fulluhtere, ðe we ymbe sprecað, astealde stiðlice drohtnunge, ægðer ge on scrude ge on bígwiste, swa swa we hwene æror rehton; forðan ðe se Wealdenda Hælend þus be him cweðende wæs, "Fram Iohannes dagum Godes rice ðolað neadunge, and ða strecan-mód hit gegripað." Cuð is gehwilcum snoterum mannum, þæt seo ealde ǽ wæs eaðelicre þonne Cristes Gesetnys sy, forðan ðe on ðære næs micel forhæfednys, ne ða gastlican drohtnunga þe Crist siððan gesette, and his apostoli. Oðer is seo gesetnys ðe se cyning bytt ðurh his ealdormenn oððe gerefan, oðer bið his agen gebann on his andweardnysse. Godes rice is gecweden on ðisre stowe seo hálige gelaðung, þæt is eal cristen folc, þe sceal mid neadunge and strecum mode þæt heofonlice rice geearnian. {360} Hu mæg beon butan strece and neadunge, þæt gehwá mid clænnysse þæt gále gecynd þurh Godes gife gewylde? Oððe hwá gestilð hatheortnysse his modes mid geðylde, butan earfoðnysse? oððe hwá awent modignysse mid soðre eadmodnysse? oððe hwá druncennysse mid syfernysse? oððe hwá gitsunge mid rúmgifulnysse, butan strece? Ac se ðe his ðeawas mid anmodnysse, þurh Godes fultum, swa awent, he bið ðonne to oðrum menn geworht; oðer he bið þurh gódnysse, and se ylca ðurh edwiste, and he gelæcð ðonne ðurh strece þæt heofenlice rice.