Beda se trahtnere us onwrihð þa deopnysse ðysre rædinge, and cwyð, þæt Philippus se fyðerríca ða buruh Cesarea getimbrode, and on wurðmynte þæs caseres Tiberii, ðe he under {366} rixode, ðære byrig naman gesceop, 'Cesaream,' and for his agenum gemynde to ðam naman geyhte, 'Philippi,' ðus cweðende, 'Cesarea Philippi,' swilce seo burh him bám to wurðmynte swa genemned wære. Þaða se Hælend to ðære burhscire genealæhte, þa befrán hé, hu woruld-menn be him cwyddedon: na swilce hé nyste manna cwyddunga be him, ac hé wolde, mid soðre andetnysse ðæs rihtan geleafan, adwæscan ðone leasan wenan dweligendra manna. His apostoli him andwyrdon, "Sume men cwyddiað þæt ðu sy Iohannes se Fulluhtere, sume secgað þæt ðu sy Helias, sume Hieremias, oððe án ðæra witegena." Drihten ða befrán, "Hwæt secge ge þæt ic sy?" swylce he swa cwæde, 'Nu woruld-menn ðus dwollice me oncnawað, ge ðe godas sind, hu oncnawe ge me?' Se trahtnere cwæð 'godas,' forðan ðe se soða God, seðe ana is Ælmihtig, hæfð geunnen ðone wurðmynt his gecorenum, þæt hé hí godas gecigð. Him andwyrde se gehyrsuma Petrus, "Ðu eart Crist, þæs lifigendan Godes Sunu." He cwæð 'þæs lifigendan Godes,' for twæminge ðæra leasra goda, ða ðe hæðene ðeoda, mid mislicum gedwylde bepæhte, wurðodon. Sume hí gelyfdon on deade entas, and him deorwurðlice anlicnyssa arærdon, and cwædon þæt hí godas wæron, for ðære micelan strencðe ðe hí hæfdon: wæs ðeah heora líf swiðe mánfullic and bysmurfull; be ðam cwæð se witega, "Ðæra hæðenra anlicnyssa sind gyldene and sylfrene, manna handgeweorc: hí habbað dumne muð and blinde eagan, deafe earan and ungrapigende handa, fét butan feðe, bodig butan life." Sume hí gelyfdon on ða sunnan, sume on ðone monan, sume on fyr, and on manega oðre gesceafta: cwædon þæt hí for heora fægernysse godas wæron. Nu todælde Petrus swutelice ðone soðan geleafan, ðaða he cwæð, "Þu eart Crist, ðæs lifigendan Godes Sunu." Se is lybbende God þe hæfð líf and wununge ðurh hine sylfne, butan anginne, and seðe ealle gesceafta þurh his agen Bearn, þæt is, his Wisdom, gesceop, and him eallum líf forgeaf ðurh {368} ðone Halgan Gast. On ðissum ðrym hádum is an Godcundnys, and án gecynd, and án weorc untodæledlice. Drihten cwæð to Petre, "Eadig eart ðu, culfran sunu." Se Halga Gast wæs gesewen ofer Criste on culfran anlicnysse. Nu gecigde se Hælend Petrum culfran bearn, forðan ðe he wæs afylled mid bilewitnysse and gife ðæs Halgan Gastes. He cwæð, "Ne onwreah ðe flæsc ne blod þisne geleafan, ac min Fæder seðe on heofenum is." Flæsc and blod is gecweden, his flæsclice mæið. Næfde he þæt andgit ðurh mæglice lare, ac se Heofenlica Fæder, ðurh ðone Halgan Gast, ðisne geleafan on Petres heortan forgeaf.