Æfter Drihtnes upstige wæs Petrus bodigende geleafan ðam leodscipum ðe sind gecwedene Galatia, Cappadocia, Bithinia, Asia, Italia. Syððan, ymbe tyn geara fyrst, hé gewende to Romebyrig, bodigende godspel; and on ðære byrig hé gesette his biscop-setl, and ðær gesæt fif and twentig geara, lærende ða Romaniscan ceastregewaran Godes mærða, mid micclum tacnum. His wiðerwinna wæs on eallum his færelde sum drý, se wæs Simon geháten. Þes drý wæs mid {372} ðam awyrgedum gaste to ðam swyðe afylled, þæt he cwæð þæt he wære Crist, Godes Sunu, and mid his drycræfte ðæs folces geleafan amyrde. Þa gelámp hit þæt man ferede anre wuduwan suna líc ðær Petrus bodigende wæs. He ða cwæð to ðam folce and to ðam drý, "Genealǽcað ðære bære, and gelyfað þæt ðæs bodung soð sy, ðe ðone deadan to life arærð." Hwæt ða Simon wearð gebyld þurh deofles gast, and cwæð, "Swa hraðe swa ic þone deadan arǽre, acwellað minne wiðerwinnan Petrum." Þæt folc him andwyrde, "Cucenne we hine forbærnað." Simon ða mid deofles cræfte dyde þæt ðæs deadan líc styrigende wæs. Þa wende þæt folc þæt he geedcucod wære. Petrus ða ofer eall clypode, "Gif he geedcucod sy, sprece to ús, and astande; onbyrige metes, and ham gecyrre." Þæt folc ða hrymde hlúddre stemne, "Gif Simon ðis ne deð, hé sceal þæt wite ðolian ðe hé ðe gemynte." Simon to ðisum wordum hine gebealh and fleonde wæs, ac þæt folc mid ormǽtum edwite hine gehæfte. Se Godes apostol ða genealæhte ðam lice mid aðenedum earmum, ðus biddende, "Ðu, leofa Drihten, ðe ús sendest to bodigenne ðinne geleafan, and ús behete þæt we mihton, ðurh ðinne naman, deoflu todræfan, and untrume gehælan, and ða deadan aræran, arǽr nu ðisne cnapan, þæt ðis folc oncnáwe þæt nan God nys buton ðu ana, mid ðinum Fæder, and ðam Halgan Gaste." Æfter ðisum gebede arás se deada, and gebígedum cneowum to Petre cwæð, "Ic geseah Hælend Crist, and hé sende his englas forð for ðinre bene, þæt hí me to life gelæddon." Þæt folc ða mid anre stemne clypigende cwæð, "An God is ðe Petrus bodað:" and woldon forbǽrnan ðone drý, ac Petrus him forwyrnde; cwæð, þæt se Hælend him tæhte ðone regol, þæt hí sceoldon yfel mid góde forgyldan. Simon, ðaða he ðam folce ætwunden wæs, getígde ænne ormǽtne ryððan innan ðam geate þær Petrus inn hæfde, þæt {374} he fǽrlice hine abítan sceolde. Hwæt ða Petrus cóm, and ðone ryððan untígde mid ðisum bebode, "Yrn, and sege Simone, þæt he leng mid his drycræfte Godes folc ne bepæce, ðe hé mid his agenum blode gebohte." And hé sona getengde wið þæs drýs, and hine on fleame gebrohte. Petrus wearð æfterweard þus cweðende, "On Godes naman ic ðe bebeode, þæt ðu nænne toð on his lice ne gefæstnige." Se hund, ðaða hé ne moste his lichaman derian, totær his hæteru sticmælum of his bæce, and hine dráf geond ða weallas, ðeotende swa swa wulf, on ðæs folces gesihðe. He ða ætbærst ðam hunde, and to lángum fyrste siððan, for ðære sceame, næs gesewen on Romana-byrig.