Syððan eft on fyrste he begeat sumne ðe hine bespræc to ðam casere Nerone, and gelámp ða þæt se awyrgeda ehtere þone deofles ðen his freondscipum geðeodde. Mid ðam ðe hit ðus gedón wæs, ða æteowde Crist hine sylfne Petre on gastlicere gesihðe, and mid ðyssere tihtinge hine gehyrte, "Se drý Simon and se wælhreowa Nero sind mid deofles gaste afyllede, and syrwiað ongean ðe; ac ne beo ðu afyrht; ic beo mid þe, and ic sende minne ðeowan Paulum ðe to frofre, se stæpð to merigen into Romana-byrig, and gýt mid gastlicum gecampe winnað ongean ðone drý, and hine awurpað into helle grunde: and gýt siððan samod to minum rice becumað mid sige martyrdomes." Non passus est Paulus, quando uinctus Romam perductus est, sed post aliquot annos, quando sponte illuc iterum reuersus est. Þis gelámp swa soðlice. On ðone oðerne dæg com Paulus into ðære byrig, and heora ægðer oðerne mid micelre blisse underfeng, and wæron togædere bodigende binnan ðære byrig seofon monðas þam folce lifes weig. Beah ða ungerim folces to cristendome þurh Petres lare; and eac ðæs caseres gebedda Libia, and his heah-gerefan wíf Agrippina wurdon swa gelyfede þæt hí forbugon heora wera neawiste. Þurh Paules bodunge gelyfdon ðæs caseres ðegnas and {376} híredcnihtas, and æfter heora fulluhte noldon gecyrran to his hírede. Simon se drý worhte ða ærene næddran, styrigende swylce heo cucu wære; and dyde þæt ða anlicnyssa ðæra hæðenra hlihhende wæron and styrigende; and he sylf wearð færlice upp on ðære lyfte gesewen. Þær-to-geanes gehælde Petrus blinde, and healte, and deofol-seoce, and ða deadan arærde, and cwæð to ðam folce þæt hí sceoldon forfleon þæs deofles drýcræft, ðylæs ðe hí mid his lotwrencum bepæhte wurdon. Þa wearð ðis ðam casere gecydd, and he het ðone drý him to gefeccan, and eac ða apostolas. Simon bræd his hiw ætforan ðam casere, swa þæt he wearð færlice geðuht cnapa, and eft hárwenge; hwíltidum on wimmannes hade, and eft ðærrihte on cnihthade.