Paulus cwæð to Petre, "Broðer, þu wære Gode gecoren ær ic, ðe gedafnað þæt þu ðisne deofles ðen mid ðinum benum afylle; and ic eac mine cneowu gebige to ðære bene." Þa beseah Petrus to ðam fleondan drý, þus cweðende, "Ic halsige eow awirigede gastas, on Cristes naman, þæt ge forlæton ðone drý ðe ge betwux eow feriað;" and ða deoflu þærrihte hine forleton, and he feallende tobærst on feower sticca. Þa feower sticca clifodon to feower stanum, ða sind to gewitnysse ðæs apostolican siges oð þisne andweardan dæg. Petres geðyld geðafode þæt ða hellican fynd hine up geond þa lyft sume hwile feredon, þæt he on his fylle þy hetelicor hreosan sceolde; and se ðe lytle ær beotlice mid deoflicum fiðerhaman fleon wolde, þæt he ða færlice his feðe forlure. Him gedafenode þæt hé on heannysse ahafen wurde, þæt hé on gesihðe ealles folces hreosende ða eorðan gesohte. Hwæt ða, Nero bebead Petrum and Paulum on bendum gehealdan, and ða sticca Simones hreawes mid wearde {382} besettan: wende þæt hé of deaðe on ðam ðriddan dæge arisan mihte. Petrus cwæð, "Ðes Simon ne ge-edcucað ǽr ðam gemǽnum æriste, ac he is to ecum witum geniðerod." Se Godes wiðerwinna ða, Nero, mid geðeahte his heah-gerefan Agrippan, het Paulum beheafdian, and Petrum on rode ahón. Paulus ða, be ðæs cwelleres hæse, underbeah swurdes ecge, and Petrus rode-hengene astah. Þaða hé to ðære rode gelæd wæs, he cwæð to ðam cwellerum, "Ic bidde eow, wendað min heafod adúne, and astreccað mine fét wið heofonas weard: ne eom ic wyrðe þæt ic swa hangige swa min Drihten. He astah of heofonum for middangeardes alysednysse, and wæron forði his fét niðer awende. Me he clypað nu to his rice; awendað forði mine fótwelmas to ðan heofonlican wege." And ða cwelleras him ða þæs getiðodon. Þa wolde þæt cristene folc ðone casere acwellan, ac Petrus mid þisum wordum hí gestilde: "Mín Drihten for feawum dagum me geswutelode þæt ic sceolde mid þysre ðrowunge his fótswaðum fylian: nu, mine bearn, ne gelette ge minne weg. Mine fét sind nu awende to ðam heofenlican life. Blissiað mid me; nu to-dæg ic onfó minre earfoðnysse edlean." He wæs ða biddende his Drihten mid þisum wordum: "Hælend mín, ic ðe betæce ðine scep, þe ðu me befæstest: ne beoð hi hyrdelease þonne hí ðe habbað." And hé mid þisum wordum ageaf his gast. Samod hí ferdon, Petrus and Paulus, on ðisum dæge, sigefæste to ðære heofonlican wununge, on þam syx and þrittegoðan geare æfter Cristes ðrowunge, mid þam hí wuniað on ecnysse. Igitur Hieronimus et quique alii auctores testantur, quod in una die simul Petrus et Paulus martirizati sunt. Æfter heora ðrowunge þærrihte comon wlitige weras, and uncuðe eallum folce: cwædon þæt hi comon fram Hierusalem, to ðy þæt hi woldon ðæra apostola líc bebyrian; and swa dydon mid micelre arwurðnysse, and sædon þam folce, þæt {384} hí micclum blissian mihton, forðan ðe hi swylce mundboran on heora neawiste habban moston.