Þa bewende Nero hine to Paulum, and cwæð, "Hwí ne cwest ðu nán word? Oððe hwa teah ðe? oððe hwæt lærdest ðu mid þinre bodunge?" Paulus him andwyrde, "La leof, hwæt wille ic ðisum forlorenum wiðersacan geandwyrdan? Gif ðu wilt his wordum gehyrsumian, þu amyrst ðine sawle and eac ðinne cynedom. Be minre lare, þe ðu axast, ic ðe andwyrde. Se Hælend, þe Petrum lærde on his andweardnysse, se ylca me lærde mid onwrigenysse; and ic gefylde mid Godes lare fram Hierusalem, oðþæt ic com to Iliricum. Ic lærde þæt men him betweonan lufodon and geárwurðedon. Ic tæhte ðam rícan, þæt hí ne onhofon hí, ne heora hiht on leasum welan ne besetton, ac on Gode anum. Ic tæhte ðam medeman mannum, þæt hí gehealdene wæron on heora bigwiste and scrude. Ic bebead þearfum, þæt hí blissodon on heora hafenleaste. Fæderas ic manode, þæt hí mid steore Godes eges heora cild geðeawodon. Þam cildum ic bead, þæt hí gehyrsume wæron fæder and meder to halwendum mynegungum. Ic lærde weras, þæt hí heora ǽwe heoldon, forðan þæt se wer gewitnað on æwbræcum wife, þæt wrecð God on ǽwbræcum were. Ic manode ǽwfæste wíf, þæt hí heora weras inweardlice lufodon, and him mid ege gehyrsumodon, swa swa hlafordum. Ic lærde hlafordas, þæt hí heora ðeowum liðe wæron; forðan ðe hí sind gebroðru for Gode, se hlaford and se ðeowa. Ic bebead ðeowum mannum, þæt hí getreowlice, and swa swa Gode heora hlafordum þeowdon. Ic tæhte eallum geleaffullum mannum, þæt hí wurðian ænne God Ælmihtigne and ungesewenlicne. Ne leornode ic ðas lare æt nanum eorðlicum menn, ac Hælend {380} Crist of heofonum me spræc to, and sende me to bodigenne his láre eallum ðeodum, ðus cweðende, 'Far ðu geond þas woruld, and ic beo mid þe; and swa hwæt swa ðu cwyst oþþe dest, ic hit gerihtwisige.'" Se casere wearð þa ablicged mid þisum wordum. Simon cwæð, "Ðu góda cyning, ne understenst ðu ðisra twegra manna gereonunge ongean me. Ic com Soðfæstnys, ac ðas ðweorigað wið me. Hát nu aræran ænne heahne torr, þæt ic ðone astige; forðan ðe mine englas nellað cuman to me on eorðan betwux synfullum mannum: and ic wylle astigan to minum fæder, and ic bebeode minum englum, þæt hi ðe to minum rice gefeccan." Nero ða cwæð, "Ic wylle geseon gif ðu ðas behát mid weorcum gefylst;" and het ða ðone torr mid micclum ofste on smeðum felda aræran, and bebead eallum his folce þæt hi to ðyssere wæfersyne samod comon. Se drý astah ðone torr ætforan eallum ðam folce, and astrehtum earmum ongann fleogan on ða lyft.