Micel todál is betwux þam gecyrredum mannum: sume hí geefenlæcað þam apostolum, sume hí geefenlæcað Iudan, Cristes belǽwan, sume Annanian and Saphiran, sume Giezi. Þa ðe ealle gewitendlice ðing to ðæra apostola efenlæcunge forseoð, for intingan þæs écan lifes, hí habbað lóf and ða écan edlean mid Cristes apostolum. Se ðe betwux munecum drohtnigende, on mynstres æhtum mid fácne swicað, he bið Iudan gefera, ðe Crist belæwde, and his wite mid hellwarum underfehð. Se ðe mid twyfealdum geðance to mynsterlicre drohtnunge gecyrð, and sumne dæl his æhta dælð, sumne him sylfum gehylt, and næfð nænne truwan to ðam Ælmihtigan, þæt he him foresceawige andlyfene and gewǽda and oðere neoda, he underfehð þone awyrgedan cwyde mid Annanian and Saphiran, þe swicedon on heora agenum æhtum, and mid færlicum deaðe ætforan ðam apostolum steorfende {400} afeollon. Se ðe on muneclicere drohtnunge earfoðhylde bið, and gyrnð ðæra ðinga ðe hé on woruldlicere drohtnunge næfde, oððe begitan ne mihte, buton twyn him genealæhð se hreofla Giezi, þæs witegan cnapan, and þæt þæt he on lichaman geðrowade, þæt ðrowað þes on his sawle. Se cnapa folgode ðam mæran witegan Eliseum: þa com him to sum rice mann of þam leodscipe þe is Siria geháten, his nama wæs Náámán, and he wæs hreoflig. Þa becom hé to ðam Godes witegan Eliseum, on Iudea lande, and he ðurh Godes mihte fram ðære coðe hine gehælde. Þa bead he ðam Godes menn, for his hælðe, deorwurðe sceattas. Se witega him andwyrde, "Godes miht þe gehælde, na ic. Ne underfó ic ðin feoh: ðanca Gode ðinre gesundfulnysse, and brúc ðinra æhta." Náámán ða gecyrde mid ealre his fare to his agenre leode. Þa wæs ðæs witegan cnapa, Gyezi, mid gitsunge undercropen, and of-arn, ðone ðegen Náámán ðus mid wordum liccetende, "Nu færlice comon tweigra witegena bearn to minum lareowe: asend him twa scrud and sum pund." Se ðegen him andwyrde, "Waclic bið him swa lytel to sendenne; ac genim feower scrud and twa pund." He ða gewende ongean mid þam sceattum, and bediglode his fær wið þone witegan. Se witega hine befrán, "Hwanon come ðu, Giezi?" He andwyrde, "Leof, næs ic on nanre fare." Se witega cwæð, "Ic geseah, ðurh Godes Gást, þa se ðegen alyhte of his cræte, and eode togeanes ðe, and ðu name his sceattas on feo and on reafe. Hafa ðu eac forð mid ðam sceattum his hreoflan, ðu and eal ðin ofspring on ecnysse." And hé gewende of his gesihðe mid snaw-hwitum hreoflan beslagen. Is nu forði munuchádes mannum mid micelre gecnyrdnysse to forbugenne ðas yfelan gebysnunga, and geefenlæcan þam apostolum, þæt hí, mid him and mid Gode, þæt éce líf habban moton. Amen. JUNE XXX. THE NATIVITY OF ST. PAUL THE APOSTLE.