Þa apostoli and ealle ða gecorenan ðe him geefenlæhton beoð deman on ðam micclum dæge mid Criste. Þær beoð feower werod æt ðam dome, twa gecorenra manna, and twa wiðercorenra. Þæt forme werod bið þæra apostola and heora efenlæcendra, þa ðe ealle woruld-ðing for Godes naman forleton: hí beoð ða demeras, and him ne bið nan dóm gedemed. Oðer endebyrdnys bið geleaffulra woruld-manna: him bið dóm gesett, swa þæt hi beoð asyndrede fram gemanan ðæra wiðercorenra, þus cweðendum Drihtne, "Cumað to me, ge gebletsode mines Fæder, and onfoð þæt ríce ðe eow is gegearcod fram frymðe middangeardes." An endebyrdnys bið þæra wiðercorenra, þa þe ciððe hæfdon to Gode, ac hí ne beeodon heora geleafan mid Godes bebodum: ðas beoð fordemede. Oðer endebyrdnys bið þæra hæðenra manna, þe nane cyððe to Gode næfdon: þisum bið gelæst se apostolica cwyde, "Ða ðe butan Godes ǽ syngodon, hí eac losiað butan ælcere ǽ." To ðisum twam endebyrdnyssum cweð þonne se rihtwisa Dema, "Gewitað fram me, ge awyrigedan, into ðam ecum fyre, þe is gegearcod deofle and his awyrgedum gastum." Þæt godspel cwyð forð gyt, "Ælc ðæra ðe forlæt, for {398} minum naman, fæder oððe moder, gebroðru oððe geswystru, wíf oððe bearn, land oððe gebytlu, be hundfealdum him bið forgolden, and he hæfð ðær-to-eacan þæt ece líf." Hundfeald getel is fulfremed, and se ðe forlæt ða ateorigendlican ðing for Godes naman, he underfehð þa gastlican mede be hundfealdum æt Gode. Ðes cwyde belimpð swyðe to munuchádes mannum, ða ðe for heofenan ríces myrhðe forlætað fæder, and moder, and flæsclice siblingas. Hí underfoð manega gastlice fæderas and gastlice gebroðru, forðan ðe ealle þæs hádes menn, ðe regollice lybbað, beoð him to fæderum and to gebroðrum getealde, and þær-to-eacan hí beoð mid edleane þæs ecan lifes gewelgode. Þa ðe ealle woruld-ðing be Godes hæse forseoð, and on gemænum ðingum bigwiste habbað, hí beoð fulfremede, and to ðam apostolum geendebyrde. Ða oðre ðe ðas geðincðe nabbað, þæt hi ealle heora æhta samod forlætan magon, hí dón þonne ðone dæl for Godes naman ðe him to onhagige, and him bið be hundfealdum écelice geleanod swa hwæt swa hí be anfealdum hwilwendlice dælað.