Godes wuldor, and þone Hælend standende æt his Fæder swiðran; and he cwæð, "Efne ic geseo heofenas opene, and mannes Sunu standende æt Godes swiðran." Iudei ða, mid micelre stemne hrymende, heoldon heora earan, and anmodlice him to scuton, and hi hine gelæhton, and of ðære byrig gelæddon to stænenne. Þa leas-gewitan ða lédon heora {48} hacelan ætforan fotum sumes geonges cnihtes, se wæs geciged SAULUS. Ongunnon ða oftorfian mid heardum stanum ðone eadigan Stephanum; and hé clypode, and cwæð, "Drihten Hǽlend, onfóh minne gast." And gebigde his cneowu, mid micelre stemne clypigende, "Min Drihten, ne sete ðu ðas dæda him to synne." And hé mid þam worde ða gewát to ðan Ælmihtigum Hælende, þe he on heofenan healicne standende geseah. Se wisa Augustinus spræc ymbe ðas rædinge, and smeade hwí se halga cyðere Stephanus cwæde þæt he gesawe mannes bearn standan æt Godes swyðran, and nolde cweðan Godes bearn; þonne ðe is geþuht wurðlicor be Criste to cweðenne Godes Bearn ðonne mannes Bearn. Ac hit gedafenode þæt se Hælend swa geswutelod wære on heofenum, and swa gebodod on middangearde. Eall ðæra Iudeiscra teona aras þurh þæt, hwí Drihten Crist, seðe æfter flæsce soðlice is mannes Sunu, eac swilce wære gecweden Godes Sunu? forði gemunde swiðe gedafenlice þæt godcunde gewrit, mannes Sunu standan æt Godes swiðran to gescyndenne þæra Iudeiscra úngeleaffulnysse. Crist wæs æteowed his eadigan cyðere Stephane on heofenum, seðe fram ungeleaffullum on middangearde acweald wæs, and seo heofenlice soðfæstnyss be ðam cydde gecyðnysse, þone seo eorðlice arleasnyss huxlice tælde. Hwá mæg beon rihtlice gecíged mannes Bearn, buton Criste anum, þonne ælc man is twegra manna bearn, buton him anum? Se eadiga Stephanus geseah Crist standan, forðan þe he wæs his gefylsta on ðam gastlicum gefeohte his martyrdomes. Witodlice we andettað on urum credan, þæt Drihten sitt æt his Fæder swiðran. Setl gedafenað déman, and steall fylstendum oððe feohtendum. Nu andet ure geleafa Cristes setl, forðan ðe hé is se soða déma lybbendra and deadra: and se eadiga cyðere Stephanus híne geseah standende, forðan ðe he wæs his gefylsta, swa swa we ǽr sædon. Ealra gecorenra halgena deað is deorwurðe on Godes gesihðe; ac ðeah-hwæðere is geþuht, gif ænig todál beon mæg betwux {50} martyrum, þæt se is healicost seðe ðone martyrdom æfter Gode astealde. Witodlice Stephanus wæs to diacone gehádod æt ðæra apostola handum; ac hé hí forestóp on heofenan rice mid sigefæstum deaðe; and swa se ðe wæs neoðor on endebyrdnysse, wearð fyrmest on ðrowunge; and se ðe wæs leorning-cniht on háde, ongann wesan láreow on martyrdome. Ðone deað soðlice þe se Hælend gemedemode for mannum þrowian, ðone ageaf Stephanus fyrmest manna þam Hælende. He is gecweden protomartyr, þæt is se forma cyðere, forðan ðe hé æfter Cristes ðrowunge ærest martyrdóm geðrowode. Stephanus is Grecisc nama, þæt is on Leden, Coronatus, þæt we cweðað on Englisc, Gewuldorbeagod;