eallunga þeowað; and þær to-eacan him weaxað untrumnyssa on his lichaman, þæt hé ne mæg ǽtes oððe wǽtes brucan. Hé carað dæges and nihtes þæt his feoh gehealden sy; hé gymð grædelice his teolunge, his gafoles, his gebytlu; he berypð þa wánnspedigan, he fulgǽð his lustum and his plegan; þonne færlice gewitt he of ðissere worulde, nacod and forscyldigod, synna ana mid him ferigende; forðan þe he sceal éce wíte ðrowian." Efne ðaða se apostol þas lare sprecende wæs, ða bær sum wuduwe hire suna lic to bebyrgenne, se hæfde gewifod þritigum nihtum ǽr. Seo dreorige modor þa samod mid þam licmannum rarigende hí astrehte æt þæs halgan apostoles fotum, biddende þæt he hire sunu on Godes naman arærde, swa swa he dyde þa wydewan Drusianam. Iohannes ða ofhreow þære meder and ðæra licmanna dreorignysse, and astrehte his lichaman to eorðan on langsumum gebede, and ða æt nextan arás, and eft up-ahafenum handum langlice bæd. Þaða he ðus ðriwa gedón hæfde, ða het he unwindan þæs cnihtes líc, and cwæð, "Eala ðu cniht, ðe þurh ðines flæsces lust hrædlice ðine sawle forlure; eala þu cniht, þu ne cuðest ðinne Scyppend; þu ne cuðest manna Hælend; þu ne cuðest ðone soðan freond; and forði þu beurne on þone wyrstan feond. Nu ic ageat mine tearas, and for ðinre nytennysse geornlice bæd, þæt þu of deaðe arise, and þisum twam gebroðrum, Attico and Eugenio, cyðe hú micel wuldor hí forluron, and hwilc wite hí geearnodon." Mid ðam þa arás se cniht Stacteus, and feoll to Iohannes fotum, and begann to ðreagenne þa gebroðru þe miswende wǽron, þus cweðende, "Ic geseah þa englas, þe eower gymdon, dreorige {68} wepan, and ða awyrigedan sceoccan blissigende on eowerum forwyrde. Eow wæs heofenan rice gearo, and scinende gebytlu mid wistum afyllede, and mid ecum leohte: þa ge forluron þurh unwærscipe, and ge begeaton eow ðeosterfulle wununga mid dracum afyllede, and mid brastligendum ligum, mid unasecgendlicum witum afyllede, and mid anðræcum stencum; on ðam ne ablinð granung and þoterung dæges oþþe nihtes: biddað forði mid inweardre heortan ðysne Godes apostol, eowerne lareow, þæt he eow fram ðam ecum forwyrde arære, swa swa he me fram deaðe arærde; and he eowre saula, þe nu synd adylegode of þære liflican béc, gelæde eft to Godes gife and miltsunge."