Se cniht þa Stacteus, ðe of deaðe arás, samod mid þam gebroðrum, astrehte hine to Iohannes fótswaðum, and þæt folc forð mid ealle, anmodlice biddende þæt he him to Gode geþingode. Se apostol þa bebead ðam twam gebroðrum þæt hi ðritig daga be hreowsunge dædbetende Gode geoffrodon, and on fæce geornlice bædon, þæt ða gyldenan gyrda eft to þan ærran gecynde awendon, and þa gymstanas to heora wacnysse. Æfter ðritigra daga fæce, þaþa hí ne mihton mid heora benum þæt gold and þa gymstanas to heora gecynde awendan, ða comon hi mid wope to þam apostole, þus cweðende, "Symle ðu tæhtest mildheortnysse, and þæt man oðrum miltsode; and gif man oðrum miltsað, hu micele swiðor wile God miltsian and arian mannum his hand-geweorce! Þæt þæt we mid gitsigendum eagum agylton, þæt we nu mid wependum eagum bereowsiað." Ða andwyrde se apostol, "Berað ða gyrda to wuda, and þa stanas to sǽ-strande: hi synd gecyrrede to heora gecynde." Þaða hi þis gedon hæfdon, ða underfengon hi eft Godes gife, swa þæt hi adræfdon deoflu, and blinde, and untrume gehældon, and fela tacna on Drihtnes naman gefremedon, swa swa hi ær dydon. Se apostol þa gebigde to Gode ealne þone eard Asiam, se is geteald to healfan dæle middan-eardes; and awrat ða {70} feorðan Cristes bóc, seo hrepað swyðost ymbe Cristes godcundnysse. Ða oðre þry godspelleras, Matheus, Marcus, Lucas, awriton æror be Cristes menniscnysse. Þa asprungon gedwolmenn on Godes gelaðunge, and cwædon þæt Crist nære ær he acenned wæs of Marian. Þa bædon ealle þa leod-bisceopas ðone halgan apostol þæt he þa feorðan bóc gesette, and þæra gedwolmanna dyrstignesse adwæscte. Iohannes þa bead ðreora daga fæsten gemænelice; and he æfter ðam fæstene wearð swa miclum mid Godes gaste afylled, þæt he ealle Godes englas, and ealle gesceafta, mid heahlicum mode oferstáh, and mid ðysum wordum þa godspellican gesetnysse ongan, "In principio erat uerbum, et uerbum erat apud Deum, et Deus erat uerbum, et reliqua:" þæt is on Englisc, "On frymðe wæs word, and þæt word wæs mid Gode, and þæt word wæs God; þis wæs on frymðe mid Gode; ealle ðing sind þurh hine geworhte, and nis nan þing buton him gesceapen." And swa forð on ealre þære godspellican gesetnysse, he cydde fela be Cristes godcundnysse, hu he ecelice butan angynne of his Fæder acenned is, and mid him rixað on annysse þæs Halgan Gastes, á butan ende. Feawa he awrat be his menniscnysse, forðan þe þa ðry oðre godspelleras genihtsumlice be þam heora bec setton.