We habbað oft gehyred þæt men hatað þysne dæg geares dæg, swylce þes dæg fyrmest sy on geares ymbryne; ac we ne gemetað nane geswutelunge on cristenum bocum, hwí þes dæg to geares anginne geteald sy. Þa ealdan Romani, on hæðenum dagum, ongunnon þæs geares ymbryne on ðysum dæge; and ða Ebreiscan leoda on lenctenlicere emnihte; ða Greciscan on sumerlicum sunstede; and þa Egyptiscan ðeoda ongunnon heora geares getel on hærfeste. Nu onginð ure gerím, æfter Romaniscre gesetnysse, on ðysum dæge, for nanum godcundlicum gesceade, ac for ðam ealdan gewunan. Sume ure ðening-béc onginnað on Aduentum Domini; nis ðeah þær forðy ðæs geares ord, ne eac on ðisum dæge nis mid nánum gesceade; þeah ðe ure gerím-béc on þissere stówe ge-edlæcon. Rihtlicost bið geðuht þæt þæs geares anginn on ðam dæge sy gehæfd, þe se Ælmihtiga Scyppend sunnan, and mónan, and steorran, and ealra tida anginn gesette; þæt is on þam dæge þe þæt Ebreisce folc heora geares getel onginnað; swa swa se heretoga Moyses on ðam ælicum bocum awrát. Witodlice God cwæð to Moysen be ðam monðe, "Þes monað is monða anginn, and he bið fyrmest on geares {100} monðum." Nu heold þæt Ebreisce folc ðone forman geares dæg on lenctenlicere emnihte, forðan ðe on ðam dæge wurdon gearlice tida gesette. Se eahteteoða dæg þæs monðes þe we hátað Martius, ðone ge hatað Hlyda, wæs se forma dæg ðyssere worulde. On ðam dæge worhte God leoht, and merigen, and æfen. Ða eódon þry dagas forð buton tída gemetum; forðan þe tunglan næron gesceapene, ær on þam feorðan dæge. On ðam feorðan dæge gesette se Ælmihtiga ealle tungla and gearlice tída, and hét þæt hí wǽron to tácne dagum and gearum. Nu ongynnað þa Ebreiscan heora geares anginn on þam dæge þe ealle tida gesette wæron, þæt is on ðam feorðan dæge woruldlicere gesceapenysse; and se lareow Beda telð mid micclum gesceade þæt se dæg is XII. K[=L], ðone dæg we freolsiað þam halgum were Benedick to wurðmynte, for his micclum geðincðum. Hwæt eac seo eorðe cyð mid hire ciðum, þe ðonne ge-edcuciað, þæt se tima is þæt rihtlicoste geares anginn, ðe hí on gesceapene wæron.