Ða easternan tungel-wítegan gesáwon níwne steorran beorhtne, na on heofenum betwux oðrum tunglum, ac wæs ángenga betwux heofenum and eorðan. Ða undergeaton hí þæt se seldcuða tungel gebicnode þæs soðan Cyninges acennednysse, on ðam earde ðe he oferglád; and forði comon to Iudea rice, and þone arleasan cyning Herodem mid heora bodunge ðearle afǽrdon; forðan ðe buton tweon seo eorðlice arleasnys wearð gescynd, þaða seo heofenlice healicnyss wearð geopenod. Swutol is þæt ða tungel-witegan tocneowon Crist soðne mann, ðaða hí befrunon, "Hwær is se ðe acenned is?" Hí oncneowon hine soðne Cyning, þaða hí cwædon, "Iudea {108} Cyning." Hí hine wurðodon soðne God, þaða hí cwædon, "We comon to ðy þæt we us to him gebiddan." Eaðe mihte God hí gewissian þurh ðone steorran to ðære byrig þe þæt cild on wæs, swa swa he his acennednysse þurh ðæs steorran up-spring geswutelode; ac he wolde þæt ða Iudeiscan boceras ða witegunge be ðam ræddon, and swa his cenning-stowe geswutelodon, þæt hí gehealdene wæron, gif hí woldon mid þan tungel-witegum hí to Criste gebiddan: gif hí þonne noldon, þæt hí wurdon mid þære geswutelunge geniðerode. Þa tungel-witegan ferdon and hí gebædon, and ða Iudeiscan boceras bæftan belifon, þe þa cenning-stowe þurh bóclic gescead gebícnodon. Ealle gesceafta oncneowon heora Scyppendes to-cyme, buton ðam arleasum Iudeiscum anum. Heofonas oncneowon heora Scyppend, ðaða hí on his acennednysse níwne steorran æteowdon. Sǽ oncneow ðaða Crist mid drium fot-wylmum ofer hyre yða mihtelice eode. Sunne oncneow, þaþa heo on his ðrowunge hire leoman fram mid-dæge oð nón behydde. Stanas oncneowon, ðaða hí on his forðsiðe sticmælum toburston. Seo eorðe oncneow, ðaða heo on his æriste eall byfode. Hell oncneow, ðaða heo hire hæftlingas unðances forlet. And ðeah þa heard-heortan Iudei noldon for eallum ðam tacnum þone soðan Scyppend tocnáwan, þe þa dumban gesceafta undergeaton, and mid gebicnungum geswutolodon. Næron hí swa-ðeah ealle endemes ungeleaffulle, ac of heora cynne wæron ægðer ge wítegan ge apostolas, and fela ðusenda gelyfedra manna. Þaþa ða tungel-witegan þone cyning gecyrdon, þa wearð se steorra him ungesewen; and eft, ðaða hí to ðam cilde gecyrdon, þa gesawon hí eft ðone steorran, and he ða hí gelædde to þam huse, þær hé inne wunode. Ne glad hé ealne weig him ætforan, ac syððan hí comon to Iudeiscum earde, syððan he wæs heora latteow, oð þæt he bufan Cristes gesthuse ætstod. Herodes hæfde deofles getacnunge; and se ðe fram Gode {110} bichð to deofle he forlyst Godes gife, þæt is his modes onlihtinge, swa swa ða tungel-witegan ðone steorran forluron, ðaða hí ðone reðan cyning gecyrdon. Gif he ðonne eft þone deofol anrædlice forlǽt, ðonne gemét hé eft þæs halgan Gastes gife, þe his heortan onliht, and to Criste gelæt.