Mine gebroðra, ge habbað nu gehyred be ðan leasan wenan, þe ydele men gewyrd hatað: uton nu fón on þæs godspelles trahtnunge, þær we hit ær forleton. {116} Þa tungel-witegan eodon into ðæs cildes gesthuse, and hine gemetton mid þære meder. Hí ða mid astrehtum lichaman hi to Criste gebædon, and geopenodon heora hordfatu, and him geoffrodon þryfealde lác, gold, and recels, and myrran. Gold gedafenað cyninge; stór gebyrað to Godes ðenunge; mid myrran man behwyrfð deadra manna líc, þæt hí late rotian. Ðas ðrý tungel-wítegan hí to Criste gebǽdon, and him getacnigendlice lac offrodon. Þæt gold getacnode þæt he is soð Cyning. Se stór þæt he is soð God. Seo myrre þæt he wæs ða deadlic; ac he þurhwunað nu undeadlic on ecnysse. Sume gedwolmen wæron þe gelyfdon þæt hé God wære, ac hi nateshwón ne gelyfdon þæt hé æghwær rixode: hi offrodon Criste gastlice recels, and noldon him gold offrian. Eft wæron oðre gedwolmen ðe gelyfdon þæt he soð Cyning wære, ac hi wiðsocon þæt he God wære: ðas, buton twyn, him offrodon gold, and noldon offrian recels. Sume gedwolan andetton þæt he soð God wære and soð Cyning, and wiðsocon þæt hé deadlic flæsc underfenge: þas witodlice him brohton gold and stór, and noldon bringan myrran þære onfangenre deadlicnysse. Mine gebroðra, uton we geoffrian urum Drihtne gold, þæt we andettan þæt hé soð Cyning sy, and æghwær rixige. Uton him offrian stór, þæt we gelyfon þæt hé ǽfre God wæs, seðe on þære tide man æteowde. Uton him bringan myrran, þæt we gelyfan þæt he wæs deadlic on urum flæsce, seðe is unðrowigendlic on his godcundnysse. He wæs deadlic on menniscnysse ær his ðrowunge, ac he bið heonon-forð undeadlic, swa swa we ealle beoð æfter ðam gemænelicum æriste.