Matheus, se eadiga Godspellere awrát on þissere godspellican rædinge, þæt "se Hælend niðer-eode of anre dune, and him filigde micel menigu. Efne ða com sum hreoflig mann, and aleat wið þæs Hælendes, þus cweðende, Drihten, gif þu wilt, þu miht me geclænsian. Se Hælend astrehte his hand, and hine hrepode, and cwæð, Ic wylle; and sy ðu geclænsod. Þa sona wearð his hreofla eal geclænsod, and he wæs gehæled. Ða cwæð se Hælend him to, Warna þæt þu hit nanum menn ne secge; ac far to Godes temple, and geswutela ðe sylfne ðam sacerde, and geoffra ðine lác, swá swá Moyses bebead him on gewitnysse." Se láreow Hægmon cweð on ðissere trahtnunge þæt seo dún þe se Hælend of-astah getacnode heofenan rice, of ðam niðer-astah se Ælmihtiga Godes Sunu, ðaða he underfeng ure gecynd, and to menniscum men geflæschamod wearð, to ðy þæt he mancynn fram deofles anwealde alysde. He wæs ungesewenlic and unðrowigendlic on his gecynde; þa wearð he gesewenlic on urum gecynde, and þrowigendlic. Seo micele menigu ðe him filigde getacnode ða geleaffullan cristenan, þe mid heora þeawa stæpum Drihtne filiað. Witodlice we folgiað Cristes fotswaðum, gif we his gebisnungum mid godum weorcum geefenlæcað. "Efne ða com sum hreoflig man, and aleat wið þæs Hælendes, þus cweðende, Drihten, gif þu wilt, ðu miht me geclænsian. Se Hælend {122} astrehte his hand, and hine hrepode, and cwæð, Ic wille; and sy ðu geclænsod. Þa sona wearð his hreofla eal geclænsod, and he wæs gehæled." On ðissere dæde is geswutelod Godes miht, and his eadmodnys. Moyses ǽ forbead to hrepenne ænigne hreoflan, ac se eadmoda Crist nolde hine forseon, þeah ðe he atelic wære, and eac geswutelode þæt hé wæs Hlaford þære ealdan ǽ, and na ðeow. Mihtiglice he mihte mid his worde hine gehælan, buton hrepunge; ac he geswutelode þæt his hrepung is swiðe halwende geleaffullum. Geleafful wæs se hreoflia, ðaða he cwæð, "Drihten, gif þu wilt, ðu miht me geclænsian." Se Hælend andwyrde, "Ic wylle; and þu beo geclænsod." Godes hæs soðlice is weorc, swa swa se sealm-wyrhta cwæð, "He hit gecwæð, and þa gesceafta wæron geworhte. He bebead, and hí wæron gesceapene."