On gastlicum andgite getacnode þes hreoflia man eal mancyn, þe wæs atelice hreoflig, mid mislicum leahtrum on þam inran menn; ac hit gebeah to Cristes geleafan, and gleawlice undergeat þæt hit ne mihte þære sawle clænsunge onfon, buton þurh Drihten, þe nane synne ne worhte, ne nan facn næs on his muðe gemet. Laðlic bið þæs hreoflian lic mid menigfealdum springum and geswelle, and mid mislicum fagnyssum; ac se inra mann, þæt is seo sawul, bið micele atelicor, gif heo mid mislicum leahtrum begripen bið. We sceolon rihtlice gelyfan on Crist, þæt he ure sawle fram synna fagnyssum gehælan mæge; and we sceolon anrædlice his willan to ðære fremminge biddan. His hand getacnað his mihte and his flæsclicnysse. Swa swa Crist mid his handa hrepunge þone hreoflian gehælde, swa eac he alysde us fram ure sawla synnum ðurh anfenge ures flæsces; swa swa se witega Isaias cwæð, "Soðlice he sylf ætbræd ure adlunga, and ure sarnyssa he sylf abær." Mid þam ðe he forbead þam gehæledum hreoflian þæt he hit nanum men ne cydde, mid þam he sealde us bysne þæt we ne sceolon na wídmærsian ure wel-dæda, ac we sceolon {124} onscunian, mid inweardre heortan, þone ydelan gylp, gif we hwæt lytles to góde gedoð. Witodlice ne bið us mid nanum oðrum edleane forgolden, gif we goód for gylpe doð, buton mid helle susle; forðan ðe gilp is an heofod-leahter. Seo ealde ǽ bebead þæt gehwilc hreoflig man gecome to þam sacerde, and se sacerd sceolde hine fram mannum ascirian, gif hé soðlice hreoflig wære. Gif he nære swutelice hreoflig, wære ðonne be his dome clæne geteald. Gif se sacerd hine hreofligne tealde, and Godes miht hine syððan gehælde, þonne sceolde he mid lace his clænsunge Gode ðancian. Swa sceal eac se ðe mid heafod-leahtrum wiðinnan hreoflig bið cuman to Godes sacerde, and geopenian his digelnysse ðam gastlican læce, and be his ræde and fultume his sawle wunda dædbetende gelacnian. Sume men wenað þæt him genihtsumige to fulfremedum læcedome, gif hí heora synna mid onbryrdre heortan Gode ánum andettað, and ne ðurfon nanum sacerde geandettan, gif hí yfeles geswicað: ac gif heora wena soð wære, ðonne nolde Drihten asendan þone ðe he sylf gehælde to þam sacerde mid ænigre lace. For ðære ylcan gebisnunge eac hé asende Paulum, þone ðe he sylf of heofenum gespræc, to ðam sacerde Annanian, þus cweðende, "Ga inn to ðære ceastre, and ðær þe bið gesæd hwæt þe gedafenað to dónne."