Pauca quaedam loca in opere quod a cl. viro G. C. Ubaghs a. 1841 Lovanii editum est et inscribitur _Theodicea_, seu _Theologiae naturalis elementa_, adnotanda esse videntur, ut doctissimus auctor additis quibusdam illustrationibus obortas circa ejusdem operis intelligentiam difficultates e medio tollere possit. Ac 1º quidem memoranda sunt illa quae pag. 73 habentur de Dei existentia: "Deum existere demonstrari posse negamus, sed id certo certius probari etiam atque etiam affirmamus". Omnis certe ambiguitas ex hoc loco tolleretur, si post vocem _demonstrari_ adderetur _a priori,_ quod conveniret cum iis quae tradit auctor in _Logica_, p. 114, ed. tertia, de demonstrationis divisione, ubi ostendit contra Kantianos demonstrationem a posteriori, jure ac merito veram demonstrationem vocari. Auctor etiam, ibid. p. 105, haec habet: "Demonstrare, si stricte intelligitur, idem est ac probare judicium certo esse sicut effertur". Nemo autem negabit probationes existentiae Dei eam vim habere, ut respondeant notioni strictae demonstrationis quae hic a cl. auctore traditur. 2º Ubi auctor ad examen vocat diversa argumentorum genera, quae ad Dei existentiam demonstrandam afferri solent, quaedam habet quae observatione digna videntur. _Theod._, pag. 86, de argumentis physicis loquens ait: "Et licet tum recta ex rationalis naturae impulsu, etc., probari posset eumdem esse potentia et intelligentia vere infinita, illud tamen ex argumentis physicis solis et stricte spectatis secundum leges logicas effici nequit". Pag. 87, de argumentis quae moralia dicuntur ita se exprimit: "In his solis veram Dei infinitatem expresse contentam esse, strictis logicae legibus nondum plane efficitur". Additis porro quibusdam de argumento ex ente infinito, concludit: "Fide naturali et spontanea quadam progressione continua suppleamus in quod ad accuratam Dei notionem concipiendam, et ad veri Dei existentiam plene probandam illi soli probationi logicae, si strictissime acciperetur, deesse videretur". Tandem p. 89 legimus: "Probabiles quidem conjecturas facere de prima causa vel de primis causis (nesciremus utique, utrum una aut plures dicendae essent) deque earum proprietatibus possemus". In his omnibus mens doctissimi auctoris paulo clarius explicanda videtur, ne quis inde occasionem sumat vim elevandi argumentorum quae Dei existentiam demonstrant.