Ces raisons estoient par trop euidentes, mais ledict sieur ne fut pas d'aduis, qu'on remuast le malade en aucune des cabanes de [160] l'habitation, ains luy en fit dresser vne au dehors, où le malade fut transporté. Ce changement ne luy profita point: car il deteriora déslors manifestement, & mourut quatre ou cinq iours apres. Ce neantmoins les Iesuites ne mãquer[~e]t iamais de l'aider, & assister, luy fournissants toutes choses à leur possible: & le seruants iusques à sa mort. Ce bon Sauuage s'estant confessé, & receu l'extreme-onction dit au sieur de Biencourt, qu'il vouloit estre enterré auec ses peres & progeniteurs. Le P. Biard resista fort à ceste proposition, l'admonestant ne luy estre loisible estant Chrestien de vouloir estre enterré auec des Pay[~e]s damnés; veu mesmes qu'en cela il bailleroit vn grand scandale, d'autant que les Sauuages oyants, & voyants qu'il n'auroit voulu estre enterré auecques nous; facilem[~e]t [161] entreroyent en soupçon qu'il n'auroit esté Chrestien, que par apparence. En tout cas, que tout cela sembleroit tousiours vn mespris de la sepulture Chrestienne, &c. Le sieur de Biencourt repliqua pour Membertou qu'on feroit benir le lieu, & qu'on l'auoit ainsi promis audit Membertou. Le P. Biard respondit, que cela ne se pouuoit faire: d'autant que pour benir ledit lieu il faudroit deterrer les Payens y enseuelis, ce qui seroit pour se faire abominer de tous les Sauuages, & sentiroit par trop son impieté. Les raisons ne seruoyent de rien, parce que le malade estimant que le sieur de Biencourt fust de son costé, persistoit en sa deliberation. Le P. Biard pour leur donner à entendre que cest affaire estoit plus important, qu'ils ne pensoyent, leur denonça, que cest enterrement se feroit [162] sans luy, & qu'il le leur donnoit à entendre dés lors, protestant qu'il renonçoit à tous tels conseils, & resolutions, & sur ce s'en alla. Toutesfois, à ce que le malade ne pensast, que ce qu'estoit deuoir & charité ne fust cholere; il reuint en moins d'vn' heure apres, & retourna seruir le malade comm' au parauant. Dieu fauorisa son bon dessein, car le matin suiuant le Sauuage de soy mesme changea d'aduis, & dit vouloir estre enterré au commun cemetiere des Chrestiens, à fin de tesmoigner à tous sa foy, & pouuoir estre participãt des prieres, qu'il y auoit veu faire. Il mourut en fort bõ Chrestien, & son decés contrista fort les Iesuites, car ils l'aimoyent, & estoyent aimés de luy reciproquement. Souuent il leur disoit: Apprenés tost nostre langage: car quand vous l'aurés apprins vous [163] m'enseignerez, & moy enseigné deuiendray prescheur cõme vous autres, nous conuertirons tout le pays. Les Sauuages n'ont pas memoire d'auoir eu iamais vn plus grand Sagamo ny plus autorisé. Il estoit barbu comm'vn François. Et pleust à Dieu, que tous les Frãçois fussent autãt auisés & discrets comm'il estoit. Tel est le recit veritable de la maladie, & mort de Membertou. Sur lequel ie ne