_Si ie presente à vostre Majesté ces Discours de vostre nouuelle France, la description du païs, & le recit des moeurs, & façons de faire estrange, & sauuage des Canadins: Ie suis obligé par toutes sortes de deuoir à ce faire. Son commandement expres, ioinct à celuy de la Royne vostre tres-honnorée mere lors Regente, m'y a porté, auec quelques miens Compagnons, plus fauorablement que le vent, & la marée, vostre liberalité Royale m'y a entretenu quelques années, & son authorité puissante m'a deliuré des mains de certains Corsaires Anglois, qui ennemis de nostre saincte_ [iv] _foy (de laquelle nous jettions quelque semence en ces Terres Neuues, auec esperance d'en faire vne moisson plantureuse, seul motif de nostre voyage, & de vostre iussion, SIRE,) nous ont faict quitter la place à nostre grand regret, & nous ont tenu comme prisonniers quelques moys dans leur vaisseau, & preparé cent fois la hart, & la potence pour nous faire perdre la vie: le seul respect de V. Majesté les ayant empeschez d'executer leurs mauuais desseings, particulierement sur ma personne, laquelle possible la diuine prouidence a voulu reseruer par l'entremise vostre, pour estre commandée derechef de faire voile aux mesmes contrées, & continuer la culture de ce peuple sauuage. Eschappé donc de ce danger, & tout mouïllé encores du naufrage sur le port de vostre France; i'offre à vos pieds ce peu de cayers, comme vne table de tres-humble recognoissance, que si i'escris, si ie vis, c'est (apres Dieu) par vostre moyen, & faueur, SIRE. Et_ [v] _ceste obligation signalée m'estant tousiours deuant les yeux, fera que ie prieray Dieu continuellement, auec tous ceux de ma robbe, que V. Majesté croissant d'aage, & de zele puisse vn iour arborer l'estendart de la Croix auec ses fleurs de lys Royales, aux terres plus escartées des Infideles: tandis que ce grand Roy des Roys luy prepare au Ciel vne couronne tissuë d'honneur, & de gloire perpetuelle, que ie vous souhaitte, apres auoir porté la vostre en terre longuement, & heureusement; de mesme coeur, & affection que ie suis, De vostre Majesté,_ Tres-humble, & tres-obeïssant subject, & seruiteur, PIERRE BIARD. [iii] To the King. _SIRE,_