NOVS appellons Nouuelle France; les terres, & païs de l'Amerique, ou Indes Occidentales, qui sont à l'autre bord de l'Ocean de Guienne, vers le Soleil couchant, opposites à nous, & droictement correspondantes en mesme ligne de l'Orient à l'Occident. [2] On leur a imposé ce nom de Nouuelle France, pour deux raisons principalement. La premiere, d'autant que (comme i'ay dit) ces terres sont paralleles à nostre France, n'y ayant rien entre la Guienne & ces dictes contrées, sinon nostre mer d'Occident, large en son plus estroict, de huict cens lieües & d'auantage; En son plus ample peu moins de mille lieües ou enuiron. La seconde raison est d'autant que ce païs a esté premierement descouuert par les François Bretons, l'an 1504. Il y ja cent & onze ans; Et qui despuis n'ont cessé de la frequenter. Les Normans de mesme ont contribué à ce trauail des premiers; entre lesquels nous lisons, que le Capitaine Thomas Aubert, Dieppois y fit voile, l'an 1508. & en ramena des Sauuages du païs, lesquels il fit voir auec admiration, [3] & applaudissement à la France. Deux ans auant luy le Capitaine Ieã Denys de Honfleur auoit fait la mesme descouuerte; Mais par ce qu'il n'en auoit rapporté que des poissons, & des cartes Geographiques, son renom en est demeuré plus obscur, que de Thomas Aubert. Depuis l'an 1523. Iean Verazan courut toute la coste, dés la Floride iusques au Cap Breton, & en prit possession au nom de François I. son maistre. Ie croy que ç'a esté ce Iean Verazan, qui a esté le Parrain de ceste denomination de Nouuelle France: Parce que Canada, (duquel nom aussi on l'appelle communement) n'est point à proprement parler toute ceste tenuë de païs, qu'ores on nõme Nouuelle France; Ains est celle tant seulement, laquelle s'estend au long des riuages du grand Fleuue Canadas, & [4] le Gelfe de S. Laurens; qui n'est seulement, que la partie la plus Septentrionale de la Nouuelle France; ainsi qu'il vous appert par la carte Geographique, que nous vous apposons icy. Relation of New France, and the Jesuit Fathers' Voyage to that country. CHAPTER I. [1] ON THE LOCATION OF NEW FRANCE, AND THOSE WHO FIRST ATTEMPTED TO SETTLE THERE.