Or dés le commencement de ces descouuertes, les François ont beaucoup traicté du cultiuage, & habitation de ces deserts. (Deserts sont-ce voirement, tout le pays n'estant qu'vne forest infinie.) [5] Aucuns particuliers en sont encores venus iusques aux tentatiues, comme Roberual & le Marquis de la Roche, & autres. Mais l'entreprinse la plus haute diuulguée, & recente pour cest effect, a esté celle du sieur de Monts Pierre du Gas, qui s'en est acquis grande recommandation. Iceluy ayant fait vn assez notable fonds d'argent; & à cest effect associé auc[~u]s Marchands de Roüen, de sainct Malo, & de la Rochelle; receut de feu d'heureuse memoire Henry le Grand, pleine puissance, & authorité de Lieutenant de Roy sur ces dictes contrées dés le quarantiesme degré d'eleuation, iusques au quarantesixiesme: car là aboutissoit la puissance, qui luy estoit dõnée de disposer des terres; Ses priuileges neantmoins de la traitte, & gouuernement s'estendoi[~e]t iusques au 54. degré, ainsi qu'on [6] peut recognoistre par les lettres Royaux qui luy en furent expediées. Par ainsi de ceste Commission du sieur de Monts, il semble, qu'on aye prins occasion de retrecir les limites de la Nouuelle Frãce; Car (comme nous auons dit) auparauãt elle s'estendoit iusques à la Floride vers le Sud, là où maintenãt on la borne quasi communement du trenteneufuiesme degré de latitude Australe, ainsi que vous la voyez en nostre carte. Ses limites à l'Orient, sont nostre mer; à l'Occident ce sera la mer de la Chine, si nous auons assez de valeur & vertu: car autres bornes n'y a-il, qui soient certaines, le pays estant infiny, & plus estendu dix & douze fois que n'est toute nostre France.