Neantmoins, quoy qu'en disent les Astrologues, si faut-il aduouër que ce païs là (parlant vniuersellement, & cõme il est à ceste heure) est plus froid que n'est nostre Frãce, & qu'il y a diuersité grande quant aux temps & saisons de l'vn à l'autre: Dequoy les causes n'en estãs au ciel, il les faut rechercher en terre. Ie tesmoignerai fidelem[~e]t des effects lesquels i'ay experim[~e]té deux ans & demy continuels; Ie dirois trois ans & demy, n'estoit que i'ay consumé presqu'vn an à diuerses reprinses en nauigations faictes loin du Continent. Le lieu [11] de ma plus longue demeure a esté Port Royal, presque à 45. degrez de hauteur polaire. Là donc la neige nous arriuoit sur la fin de Nouembre, & ne se fondoit iamais entierement dedans les bois, que sur la fin de Feurier, s'il n'arriuoit, comme souuent, quelque grosse pluye, ou quelque fort vent de Midy qui la fondist. Mais elle n'estoit pas si tost fonduë qu'il en tomboit d'autre. Hors des bois, & au descouuert elle n'y croupit guiere plus qu'en Frãce, mais il y nege plus souuent que d'ordinaire en France: la plus haute nege, que i'y aye veu ç'a esté d'vn pied & demy, encore non pas. Quand le Norouest (qu'icy nous appellõs Galerne) se met en ses fougues, le froid y est intolerable, mais cela ne dure que huict, ou dix iours pour le plus, puis le temps s'adoucit pour vn espace, cõme en France; [12] & ne seroit on non plus empesché de trauailler à quelque mestier, voire d'aller & venir, qu'en France; si lon y estoit accommodé, comme en France. Mais ce n'a esté qu'vne extreme pauureté de tout ce que i'y ay veu. Des miserables cabanes ouuertes en plusieurs endroits: nostre viure pois, & febues, encores bi[~e] escharsement; nostre boire l'eau pure: les hardes, & habits de nos gens tous frippez; nos prouisions, d'aller au bois du iour à la iournée, nos medicaments, vn verre de vin aux bonnes festes; nos restaurans, quelque peu de chasse, ou de gibier par bonnes auentures; le lieu inhabité, les chemins sans vestige aucun, la chaussure du pied propre pour le foyer. Allez auec cela & dittes qu'il ne fait point d'hyuer en Canada. Mais au moins ne dittes, que les eaux n'y soyent fort [13] bonnes, & l'air fort salubre: car c'est de vray chose merueilleuse comme nonobstant toutes ces miseres nous nous sommes tousiours fort bien portés, estans tousiours pour le moins vingt en nombre; Et si en trois ans n'en sont morts de maladie que deux tant seulement, vn de S. Malo, & vn autre Breton: encores ce dernier mourut plus à faute d'auoir vn peu de pain & de vin pour se restaurer, (tout cela nous estant failly) que non pour atrocité de symptome; ou cruauté de maladie.