Que si nous nous souuenons comme Iacques Quartier perdit quasi toutes ses gens, la fois qu'il hiuerna premierem[~e]t en ces pays; & comme de mesme le sieur de Monts en perdit bien la moitié la premiere année de S. Croix, & l'an suiuant, qui fut le premier de port Royal, encores sentit-il grãd [14] dechet, moindre toutesfois, & puis moindre la troisiesme année. De mesmes aussi que depuis à Kebec la premiere année plusieurs fur[~e]t troussés, & non pas tant à la seconde. Cest amas de mesmes accidents nous pourra seruir à recognoistre les causes des maladies & de la santé, que tant diuersement nous auons senti. La maladie commune a esté le Scorbut, qu'on appelle maladie de la terre, les iambes, cuisses & face enflent; les leures se pourrissent, & leur suruiennent de grandes excroissances, l'haleine est courbe, auec vne fascheuse toux, les bras meurtris, & le cuir tacheté, toute la personne languit auec grand ennuy, & douleur, sans rien pouuoir aualer, sinon quelque peu de liquide. Le sieur Champlain philosophant sur cecy, attribue la cause de ces maladies aux vapeurs [15] que ceux-là boiuent, qui labourent, renuersent, & habitent premierement ces terres, lesquelles n'ont iamais esté descouuertes du soleil. Son dire n'est pas impertinent, ny sans exemples: neantmoins on peut opposer, que les mariniers, qui ne vont qu'à la coste pour pescher, & ne defrichent aucunes terres, ny ne les habitent: nonobstant souuent tombent en ce mal, & sur tous les Bretõs. Car il semble que ce mal les va triant d'entre tous les autres. Item, que nous, qui nous sommes bien portés, comme i'ay dit, renuersions neantmoins prou de terres, & les euentions, & si n'auons nous iamais sceu que c'estoit de ce mal, horsmis vn peu moy, qui au secõd hyuer, que i'y ay passé deuins fort enfle auec vne fieure, & alteratiõ incroyable: Mais i'eus tousiours les genciues, & leures entieres, & [16] mon mal se perdit en dix, ou douze iours. Ie croy bien, que cela y seruoit de beaucoup, que nostre logis n'estoit point nouueau, & que tout estant essarté à l'entour de nostre habitatiõ dés long t[~e]ps, nous auions l'air pur & libre. Et c'est à mon aduis ce que Champlain a principalement voulu dire.