Reprenons nostre tasche des temps, & saisons. I'ay remarqué vne fois les deux iours de Feurier 26. & 27. estre aussi beau, doux, & printaniers qu'on en voye point en France enuiron ce temps-là; neantmoins le troisiesme iour [18] suiuant il negea quelque peu, & le froid reuint. En esté quelque fois le chaud y est autant, ou plus intolerable qu'en France: mais il ne dure pas. Bien tost le temps se broüille. Les arbres y fueill[~e]t plus tard qu'en France pour l'ordinaire, & qu'ils n'ont fait ceste presente année 1614. Car arriuant en Picardie sur la fin d'Auril, ie n'y ay pas trouué la saison plus auancée. Encores me sembloit-il qu'en Canada tout poussoit d'auantage. Et parlant vniuersellement, le temps, & saison de ce pays-là, est du tout ressemblant à celuy que nous auons experimenté ceste dicte année icy, à Paris, & en Picardie, horsmis quant aux brumes & broüillars, ausquels ledit pays est plus subject. A Port Royal nous n'en auions gueres l'Esté, sinon prés la coste de mer; mais aux Etechemins & à Pentegoet ces [19] broüées tiennent souuent en Esté les trois & quatre iours, c'est chose fort melancholique, & nous a donné apprehension qu'elle ne permettroit point que nos moissons peussent meurir; neantmoins nous auons trop d'arguments au contraire. Car à Port Royal, qui est plus froid, & inegal, elles meurissent, & en ay l'experience de trois ans. Item Champlain asseure qu'à S. Croix, qui est en ceste mesme coste, (en vn endroit fort frilleux & nuageux) toutesfois leurs bleds, & semailles vindrent à maturité.