Mais si par tout il faut diligemment Catechiser les peuples auãt [104] que les introduire dans l'Eglise; & leur communiquer le Sacrement de regeneration; c'est en ces lieux, où sur tout il le faut. La raison est, parce que ces Canadiens sont vagabonds (comme nous auons dit,) & ayans leur vie çà & là sans arrest; & qui partant ne pourront assister ordinairement ny à messes, ny à prieres ou offices publics, ny frequ[~e]ter sermons, ny receuoir les sacrements, ny auoir des Prestres auec eux: comment est ce donc que vous voulez qu'ils se puissent entretenir en la foy & grace de Dieu, s'ils ne sõt bien instruits, & au double des autres? Car nous, qui viuons entre les troupes des Religieux, & sous la garde de tant de Pasteurs, & en l'affluence de tant de bons liures, exemples, loix & police, à peine le pouuons nous, qui sommes vieux, & pour le dire ainsi, [105] naturalisés Chrestiens, comment le pourront-ils faire tous nouueaux qu'ils sont, seuls, sans garde, sans lettres, sans institution, sans coustume? Or de dire que c'est assés d'engendrer, sans penser cõment on donnera l'entretien, c'est iustement dire, que c'est bien fait de donner vie, pour l'oster auec cruauté, ce qui n'est pas acte de Pere, ains de pire que meurtrier. Tout de mesme en est-il en la regeneration spirituelle, laquelle se faict par le Baptesme. Car la donner, sans pouruoir à la nourriture du regeneré, c'est faire ce qu'a dit nostre Sauueur; chasser le Diable d'vne maison, à celle fin qu'icelle estant balliée, & parée, l'ennemy dechassé y rentre de nouueau, non ja seul, ains accompagné de sept autres, pires que luy, & par ainsi faire que le miserable regeneré soit apres son Baptesme [106] en plus piteux estat de beaucoup, qu'il n'estoit deuant qu'estre baptisé. D'auãtage la practique a des-ja mõstré ceste necessité de bien catechiser auant le Baptesme en vn païs où la g[~e]t n'estoit point Sauuage, ains ciuile; non coureuse, mais arrestee; non abandonnee, ains sur-veillee de Pasteurs, sçauoir est, au Peru & Mexique. Car au commencem[~e]t on y baptisa fort facilem[~e]t. Qu'en aduint-il? On se trouua subitem[~e]t sur les bras, plustost vne Synagogue de Samaritains, qu'vn' Eglise de fidelles. Car ces tost Baptisez venoyent bien à l'Eglise, mais ils y marmotoyent leurs anciennes idolatries. Ils chommoyent les festes commandées; mais en faisant leurs anciens sacrifices, danses, & superstitions, ils alloyent à la saincte Communion, si l'on vouloit, mais c'estoit sans sçauoir ny _Credo_, [107] ny _Confiteor_. Et au sortir de là, s'en alloyent enyurer, & chanter au Diable leurs sorceleries accoustumées. Quel remede à ces malheurs? Quelle couuerture à ces infamies? O qu'il a fallu que ceux-là ayent sué, qui sont suruenus depuis: là où facilement, & en peu de temps cest'yuraye eust peu estre desracinée dés le commencement, en bien labourãt le chãp auant que l'ensemencer. Ie veux dire, en gardant l'ancien vsage de l'Eglise de donner le Baptesme