peuuent emmener prisonniers iusques en leurs cabanes ils leur font endurer des cruautez nompareilles, les faisant mourir à petit feu: & chose etrange! pendant tous ces tourmens, le patient chante tousiours, resputans à deshonneur s'ils crient & s'ils se plaignent. Apres que le pati[~e]t est mort, ils le mangent, & n'y a si petit qui n'en ait sa part, ils font des festins ausquels ils se conuient les vns les autres, & mesme ils conuient quelques François de leur cognoissance, & en ces festi[n]s ils donnent à chacun sa part dans des plats ou escuelles d'escorce & lors que ce sont festins à tout manger, il ne faut rien laisser, autremement vous estes obligez à payer quelque chose, & perdriez la reputation de braue [7] homme. Aux festins qu'ils font pour la mort de quelqu'vn ils font la part au defunt aussi bien qu'aux autres, laquelle ils iettent dans le feu, & se donnent bien garde que les chiens ne participe[~e]t à ce festin; & pource ramassent tous les os & les iettent dans le feu. Ils enterrent les morts & auec eux tout ce qu'ils auoient, comme chandeliers, peaux, cousteaux, &c. Et comme ie demãday vn iour à vn vieillard pourquoy ils mettoient tout ce bagage dans les fosses, il me respondit qu'ils le mettoient afin que le mort s'en seruist dans l'autre monde; & comme ie luy repartis que toutes les fois que lon regardoit dãs les fosses on y trouuoit tousiours le bagage, qui estoit vn temoignage que le mort ne s'en seruoit pas; il me respõdit, qu'à la verité le corps des chaudieres, peaux, cousteaux, &c. demeuroit; mais que l'ame des chaudieres, cousteaux, &c. s'en alloit dans l'autre monde auec le mort, & que là il s'en seruoit. Ainsi ils croyent, (comme V.R. void) l'immortalité de nos Ames; & de fait ils asseurent qu'apres la mort, ils vont au Ciel où elles mangent des champignons, & se communiquent les vnes auec les autres. Ils appellent le Soleil IESVS; & lon tient en ce païs que ce sont les Basques qui y ont cy-deuant habité, qui sont Autheurs de ceste denomination. De là vient que quand nous faisons nos Prieres, il leur semble que comme eux nous addressons nos Prieres au Soleil. A ce propos du Soleil, ces Sauuages icy croyent que la terre est percee de part en part, & que lors qu'il se couche, il est caché en vn trou de la terre, & sort le lendemain par l'autre. Ils n'ont aucun culte diuin, ny aucunes sortes de Prieres. Ils croyent neantmoins qu'il y en a Vn qui a tout fait; mais pourtant ils ne luy rendent aucun honneur. Entr'eux ils ont quelques personnes qui font estat de parler au Diable; ceux là sont aussi les Medecins, & guarissent de toute maladie. Les Sauuages craignent grandement ces gens-là, & les caress[~e]t de peur qu'ils n'en reçoiuent du mal. Nous apprendrons peu à peu ce qui est des autres Nations, lesquelles sont plus stables en leurs demeures; Car pour celles-cy où nous sommes maintenant auec les François, elle est seulement vagabonde six mois l'annee, qui sont les six mois d'Hyuer,