errans çà & là selon la chasse qu'ils trouuent, & ne se cabanent que deux ou trois familles ensemble en vn endroit, deux ou trois en l'autre, & les autres de mesme. Ez autres [8] six mois de l'annee, vingt ou trente s'assemblent sur le bord de la Riuiere pres de nostre habitation, autant à Thadoussac, & autant à quarante lieuës au dessus de nous, & là ils viuent de la chasse qu'ils ont faicte l'Hyuer, c'est à dire, de viande d'orignac, boucanee, & de viures qu'ils ont traité auec les François. Ie croy auoir escrit l'an passé ce qui est de leurs vestemens, & comme ils sont tousiours nud teste, leurs corps sont seulem[~e]t couuerts d'vne peau, ou d'orignac, ou d'vne robbe de Castor, qui sont 5. ou 6. Castors cousus ensemble, & vestent ces peaux, comme sans comparaison, les Ecclesiastiques les Chappes, n'estans attachez par deuant que d'vne courroye: quelquefois ils se ceignent d'vne ceinture, quelquefois ils n'en ont point du tout, & neantmoins pour lors on ne void rien de deshonneste, cachans fort decemment les parties que l'honnesteté veut estre couuertes. En Hyuer ils ont des chausses & des souliers faits de peau d'orignac; mais les souliers, tant dessus que dessous sont souples comme vn gand. Ils ont la plus part du temps leurs visages peints de rouge ou de gris brun & ce en diuerses façons, selon la fantaisie des femmes, qui peignent leurs maris & leurs enfans, desquels ils graissent aussi les cheueux de graisse d'ours, ou d'orignac. Les hommes n'ont non plus de barbe que les femmes, ils se l'arrachent afin de plaire dauantage aux femmes. Ie n'en ay veu que trois ou quatre qui ne se la sont point arrachee depuis peu de temps à l'imitation des François; mais pourtant ils n'en sont pas fournis. La couleur de leur chair tire fort sur le noir; on n'en void pas vn qui aye la charnure blanche, neantmoins il n'y a rien de si blanc que leurs dents. Ils võt sur les riuieres dans de petits canaux d'escorce de bouleau, fort proprement faits: dans les moindres il y peut tenir 4 ou 5. personnes, encore y mettent-ils leurs petits bagages. Les auirons sont proportionnez aux canaux l'vn deuant l'autre derriere, c'est d'ordinaire la femme qui tient celuy de derriere, & par consequent qui gouuerne. Ces pauures femmes sont de vrais mulets de charge, portant toute la fatigue; sont-elles accouchees, deux heures apres elles s'en vont aux bois pour fournir au feu de la cabane. En Hyuer lors qu'ils decabanent elles trainent les meilleurs pacquets sur la neige; bref les hommes ne semblent auoir pour partage que la chasse, la guerre, & la traitte. A propos de la [9] traitte, ie n'en ay encores rien dit, aussi est-ce l'vnique chose qui me reste touchant les Sauuages. Toutes leurs richesses sont les peaux de diuers animaux; mais principalement de Castors. Auparauant l'association de ces Messieurs ausquels le Roy a donné ceste traitte pour certain temps, moïennant quelques conditions portees par les Articles, les Sauuages estoient