aix, tant pour la couuerture, que pour le tour de la cabane; vingt cheurons, & dolerent plus de vingt-cinq grosses pieces necessaires pour l'erection de la cabane. Voila des commencemens assez heureux graces à Dieu, ie ne sçay quel sera le progrés à cause de la continuation de mes imperfections. Au reste parmy ces Sauuages nos vies ne sont pas asseurées. Si quelque François leur a fait quelque déplaisir ils s'en vengent par la mort du premier qu'ils rencontrent, sans auoir esgard à plaisir aucun qu'ils ayent receu de celuy qu'ils attaquent. S'ils ont songé la nuict qu'il faut qu'ils tuënt quelque François, gar[d]e le premier qu'ils rencontrent à l'escart. Ils ajoustent grande croyance à leurs songes. Quelques-vns deux vous diront deux iours auparauant la venuë des vaisseaux l'heure à laquelle ils arriueront, & ne vous diront autre chose sinon qu'ils l'ont veu en dormant. Ceux-la sont en reputation parmy eux de parler au Diable. Leur conuersion ne nous donnera pas peu d'affaire. Leur vie libertine & faineante, leur esprit grossier, & qui ne peut guere comprendre, la disette des mots qu'ils ont pour expliquer nos mysteres, n'ayans iamais eu aucun culte diuin, nous exercera à bon escient. Mais pourtant nous ne perdons pas courage graces à Dieu, appuyez sur cette verité, que Dieu n'aura pas tant esgard au fruict que nous ferons, qu'à la bonne volonté & au trauail que nous prendrons; & puis plus il y aura difficulté en leur conuersion, & plus y aura-t'il de défiance de nous-mesmes; tant y a que nostre esperance est en Dieu. Si ie puis ie me transporteray en d'autres nations: si cela est, il ne faut plus attendre de nouuelles, car ie seray si loin d'eux, qu'à grand peine pourray-ie leur écrire; car au cas que cela arriue ie vous dy adieu & à tout le monde iusques à ce que nous nous reuoyons au Ciel. N'oubliez pas les suffrages pour nostre ame, & faites les de fois à autres. A tout hazard lors que vous vous souuiendrez de nous en vos saincts sacrifices, dites pour vn tel vif ou mort. Le secours qui nous est venu de France est vn bon commencement pour cette Mission; mais les affaires [14] ne sont pas encore en tel estat que Dieu puisse y estre seruy fidellement. L'heretique y a autant encore d'empire que iamais, c'est pourquoy ie renuoye le Pere Noiroit selon la permissiõ que les Superieurs m'en ont faite, afin qu'il paracheue ce qu'il a commencé; il est le mieux entendu en cette affaire. Si nos Peres desirent l'affermissement, & le bon succes de cette Mission, il est du tout expedient qu'ils le laissent faire. C'est bien à son corps defendant qu'il s'en retourne, veu principalement qu'il est tant incommodé dessus la mer. I'enuoye son compagnon auec le Pere Brebeuf à 300 lieux d'icy à vne de ces nations qui sont stables en leur demeure, ils y seront bien tost s'ils trouuent des Sauuages qui les y vueillent conduire, autrement ils seront contraints de retourner vers nous; i'attends tous les iours de leurs nouuelles.