Ie viens d'apprendre tout maintenant qu'ils sont partis. Le Diable qui craint la touche a voulu jouër des siennes, car nos Peres estans desia embarquez, les Sauuages par deux ou trois fois les voulurent faire desembarquer, alleguans que leurs canaux estoient trop chargez; mais en fin Dieu l'emporta par dessus luy, on gaigna les Sauuages à force de presents. S'il plaist à Dieu faire reüssir cette mission, voila vne entrée dans des nations infinies pour ainsi dire, qui sont tousiours stables en leur demeure. I'eusse bien desiré estre de la partie, mais nos Peres ne l'ont pas iugé à propos, iugeans qu'il estoit necessaire que ie demeurasse icy, tant pour l'éstablissement de nostre petit domicille, que pour l'entretien des François. Vostre R. s'estonnera peut-estre de ce que i'ay enuoyé le P. Brebeuf qui auoit desia quelque commencement à la langue de cette nation, mais les talents que Dieu luy a departy m'y ont fait resoudre; le fruict que l'on attend de ces natiõs là estant bien autre que celuy que l'on espere de celle cy. S'il plaist à Dieu benir leurs trauaux nous aurons grand besoin d'ouuriers; les dispositions du costé des Sauuages sont telles, qu'on en peut esperer quelque chose de bon. Le truchement ayant demandé en ma presence à l'vn de leurs Capitaines s'ils seroi[~e]t tous contens que quelques-vns des nostres allassent demeurer en leur pays pour leur apprendre à cognoistre Dieu, il respondit qu'il ne falloit demander cela & qu'ils ne souhaittoient rien tant, puis ayant consideré la maison des Recollets où nous estions, il adiousta qu'à la verité ils ne pourroient pas nous bastir vne maison de pierre semblable à celle-là, [15] mais demandés leur, dit-il au truchement, s'ils seroient contans de trouuer à leur arriuee vne cabane faicte semblable aux nostres. Il ne pouuoit nous tesmoigner plus d'affection; De plus il y a eu de la sterilité dans leur pays cette année, & ils l'attribuent à cause qu'ils n'y ont point eu de Religieux, tout cela nous fait bien esperer. Pour ceux de cette Nation ie les ay fait sommer de respondre, s'ils ne vouloient pas se faire instruire; & nous donner leurs enfans pour le mesme sujet: ils nous ont tous respondu qu'ils le desiroient. Ils attendent que nous ayons basty, c'est à nous cependant de mesnager leur affection & apprendre bien leur langue. Au demeurant ie supplirois volontiers ceux qui ont de l'affection pour ce pays, qu'ils ne se dégoustassent point s'ils n'entendent promptement des nouuelles du fruict que l'on espere. La conuersion des Sauuages demande du temps. Les premieres six ou sept annees sembleront steriles à quelques vns. Et si i'adioustois iusqu'à dix ou douze, possible ne m'éloigneroisie pas de la verité. Mais est ce à dire pourtãt qu'il faille tout quitter là? Ne faut-il pas des cõmencemens par tout? Ne faut-il pas des dispositions pour arriuer où on pretend? Quand à moy ie vous confesse que Dieu me fait cette misericorde, qu'encor que ie n'esperasse aucun