Ils arriuerent à l'Isle de Faeal, qui est vne des Açores, & ne se pensoyent à leur arriuée, que d'anchrer aupres de la ville, d'enuoyer leur batteau pour se charger d'eau, de laquelle ils auoyent principalement besoin, & achepter quelque peu de biscuit, & autres necessitez plus pressantes. En ceste façon il estoit fort facile [288 i.e., 290] de cacher les Iesuites, parce qu'on ne visite gueres, que fort legerement ceux qui sont loin de terre, & puis la visite passee: tout le peril est passé. Ceste consideration fit resoudre tant facilem[~e]t le Capitaine à ne pas vser de cruauté. Mais la fortune trouua bien autres tours, & destours qu'il ne p[~e]soit: car il luy fallust entrer dans le haure, & se tenir à la veuë de la ville, & des autres nauires. Là de sinistre accident, nostre nauire s'alla heurter contre vne carauelle Espagnolle, chargée de succre, & luy rompit son beau-pré; l'Espagnol pensa que ce fut vn guet à pens, à celle fin de surprendre son vaisseau, & le voler: tout ainsi qu'auoit faict vn François dans le mesme port, cinq semaines au parauãt, & partant se print à crier au coursaire, faisant armer ses gens, & peu s'en fallut que lon [289 i.e., 291] ne vinst aux mains. Grand bruit & grande esmeute dans la ville, & par tous les nauires qui estoyent là, grand alarme. Il fallust que le Capitaine allast à terre, & y demeurast pour gages, & asseurance: encores ne pouuoit-on croire, qu'il fut autre que Pirate. on vint visiter & reuisiter le nauire, & les Iesuites ioüoyent comme l'on dit a esconsailles, de trou en cachot, & de cachot en fonds, tousiours en quelque nouuelle musse. Or sur le vif, & le chaud des soupçons, & grabuge, les Espagnols venants visiter les pauures Peres & le garcon Francois estoyent derriere vne chaloupe se tenant coys & sans souffler, car si seulement ils eussent soufflé vn peu gros, ou remué la main ou le pied, ils eussent esté descouuerts. La chose estoit si hazardeuse, que nos Anglois en transissoyent de [290 i.e., 292] male-peur. Mais les Iesuites leur voulurent constamment garder la foy pour plusieurs raisõs, & entre autres, pour faire voir par effect aux calomniateurs de l'Eglise Catholique, qu'à tort, & contre verité ils luy imposent d'enseigner, qu'il ne faut point garder la foy aux heretiques. Ce qu'est totalement faux, & contre sa doctrine. Mais reuenons aux Espagnols, ils n'apperceurent iamais lesdits peres en leur visite, & s'en allerent en fort bonne opinion des Anglois, qui les voyants dehors, & reuenants à soy de la grande apprehension en laquelle ils auoyent esté, se prindrent à faire tant de caresses aux Peres, & tant de feste en recognoissance de leur sincérité, qu'en pourroy[~e]t faire vne troupe de bons parents & amys s'entre rencontrants en paix apres vne absence, & separation [291 i.e., 293] de bien long temps. Les mesmes Anglois ont souuent depuis loüangé lesdicts Peres en la presence de leurs Ministres en Angleterre de ceste leur fidelité, & les